الیکشن کمیشن کا تمام سیاسی جماعتوں کو رات 12 بجے سے قبل انتخابی مہم ختم کر نے کا حکم

الیکشن کمیشن نے امیدواروں اور سیاسی جماعتوں کی توجہ مبذول کرائی ہے کہ وہ منگل اور بدھ کی درمیانی شب رات 12بجے سے قبل اپنی انتخابی مہم ختم کر دیں۔

الیکشن کمیشن سے جاری بیان کے مطابق الیکشن کمیشن نے عام انتخابات 2024 میں حصہ لینے والے تمام امیدواران اور سیاسی جماعتوں کو مطلع کیا کہ الیکشنزایکٹ کی سیکشن 182 کے مطابق آج 6 فروری کی شب 12 بجے کے بعد کوئی بھی شخص کسی بھی جلسے، جلوس، کارنر میٹنگ یا اس نوعیت کی سیاسی سرگرمی کا نہ تو انعقاد کرے گا اور نہ ہی اس میں شرکت کرے گا۔ کوئی بھی شخص جو قانون کی مذکورہ بالاشق کی خلاف ورزی کرے گا اس کے خلاف قانونی کارروائی عمل میں لائی جائے گی۔

مذکورہ بالا وقت کے بعد الیکشن کمپین ، اشتہارات و دیگر تحریری مواد کی الیکٹرانک اور پرنٹ میڈیاپر تشہیر پر پابندی ہے جس سے کسی خاص سیاسی پارٹی یاامیدوار کی حمایت یا مخالفت کا شبہ ہو ۔ اس کے علاوہ انتخابی عمل کے انعقاد تک میڈیاپرہر قسم کے پول سروے پربھی پابندی ہو گی۔

میڈیا گروپس پولنگ کے اختتام کے ایک گھنٹہ گزر نے کےبعد رپورٹنگ رزلٹ کی نشریات شروع کر سکتا ہے جس سے یہ واضح طورپر بتایا جائے گا کہ یہ رزلٹ غیر حتمی و غیر سرکاری ہے۔

ریٹرننگ آفیسرز پولنگ اسٹیشنوں کا پروگریسو رزلٹ اور مکمل غیر حتمی رزلٹ جاری کریں گے۔ الیکٹرانک و پرنٹ میڈیا کوڈ آف کنڈکٹ پر سختی سے عمل کرے گا اور خلاف ورزی پر پیمرا اور پی ٹی اے کو قانونی کارروائی کرنے کی ہدایات جاری کر دی گئی ہیں۔