پاکستان کے عوام بے خوف و خطر اپنا ووٹ کا حق استعمال کریں ،وزیر داخلہ

نگران وزیر داخلہ گوہر اعجاز نے کہا ہے کہ عام انتخابات کا پر امن اور شفاف انعقاد یقینی بنانے کے لئے تمام ضروری انتظامات کرلئے گئے ہیں۔

انہوں نے اطلاعات و نشریات کے وزیر مرتضی سولنگی کے ہمراہ منگل کے روز اسلام آباد میں ایک نیوز کانفرنس سے خطاب کرتے ہوئے اس بات پرزور دیا کہ پولنگ کے روز لوگ گھروں سے نکلیں اور کسی خوف اور ڈر کے بغیر اپنا حق رائے دہی استعمال کریں۔

وزیر داخلہ نے کہاکہ سول مسلح افواج ،مسلح افواج اور پولیس کے علاوہ انتظامیہ پولنگ کے روز سازگار ماحول یقینی بنانے کیلئے دن رات کام کررہی ہے ، گوہر اعجاز نے کہا کہ ملک بھر میں نوے ہزار سے زائد پولنگ اسٹیشنز قائم کیے گئے ہیں۔

چوالیس ہزار پولنگ اسٹیشنز کو پرامن قرار دیا گیاہے ،

تقریباً30 ہزار پولنگ اسٹیشنز کو حساس اور سولہ ہزارسے زائد پولنگ اسٹیشنز کو انتہائی حساس قراردیا گیا ہے۔وزیر اطلاعات نے اظہار خیال کرتے ہوئے کہا کہ تمام افواہوں کے باوجود عام انتخابات جمعرات کو ہورہے ہیں۔

انہوں نے کہا کہ وزرات اطلاعات نے مقامی اور غیر ملکی صحافیوں کی سہولت کے لئے ایک ایپ کا بھی اجراء کیا ہے۔