پی ٹی آئی ووٹوں میں رد و بدل کے باوجود آج بھی بڑی جماعت ہے، بابر اعوان

پاکستان تحریک انصاف کے رہنما بابر اعوان نے کہا ہے کہ پی ٹی آئی ووٹوں میں رد و بدل کے باوجود آج بھی بڑی جماعت ہے۔ انکی حکومت نہ بنی تو کوئی بھی حکومت نہیں چلے گی۔

اسلام آباد میں الیکشن کمیشن کے باہر میڈیا سے گفتگو کرتے ہوئے پی ٹی آئی کے وکیل بابراعوان نے کہا کہ پاکستانی قوم کا ووٹ چوری کیا گیا، 5 روز سے دھاندلی کی مکمل کوششیں ہو رہی ہیں۔ سب نے الیکشن کے نتائج کو مسترد کر دیا ہے، ووٹ کی بے عزتی کرکے نواز شریف کو عزت نہیں ملے گی بلکہ یہ الیکشن ن لیگی رہنما کےلئے دوسرا پانامہ ثابت ہو گا۔

پاکستان تحریک انصاف کے وکیل بابراعوان نے کہا ہے کہ پی ٹی آئی اس وقت اکثریتی پارٹی ہے ہمیں مرکز اور 2 صوبوں میں حکومت کا موقع دینا چاہیئے، اگر ایسا نہ کیا گیا تو حکومت نہیں چل سکتی، این اے 106 کے فارم 47 میں غلطیاں ہیں۔  پاکستان اس وقت اندرونی طور پر انقلاب میں مبتلا ہے، 2 سال کوشش کے باوجود نواز شریف اکیلا دوڑا اور ہار گیا۔

بابراعوان نے مزید کہا کہ مانسہرہ میں جلسے نہ کرسکےلیکن لوگوں نے ووٹ سے اپنا فیصلہ سنا دیا، آج پانچواں دن ہے ابھی تک آپریشنل رد و بدل جاری ہے۔