حکومت سازی کے لیے پیپلز پارٹی،ن لیگ اورایم کیوایم سےاتحاد نہیں ہوسکتا، بانی چیئرمین پی ٹی آئی

بانی چیئرمین پی ٹی آئی انصاف عمران خان نے واضح کیا ہے کہ حکومت سازی کے لیے پیپلز پارٹی،ن لیگ اورایم کیوایم سےاتحاد نہیں ہوسکتا، حسن رؤف کو ان 3 جماعتوں کے علاوہ سب کو اکٹھا کرنے کا کہا ہے۔

9 مئی کے مقدمات کی سماعت کے دوران اڈیالہ جیل میں میڈیاسےغیررسمی گفتگو کرنے والے عمران خان نے کہا کہ انتخابات میں دھاندلی سے ملک میں عدم استحکام بڑھے گا اور معیشت پر برا اثر پڑے گا، میں کہتا رہا کہ ازاد اور شفاف انتخابات واحد حل ہیں۔ہم سب سے پہلے انتخابی نتائج کو چیلنج کر رہے ہیں،نتائج کے خلاف سپریم کورٹ بھی جائیں گے۔ اب پتہ چل گیا کہ ہم آراوز کےالیکشن کے خلاف کیوں تھے۔

انہوں نے بتایا کہ پی ٹی آئی کی جانب سے وزیراعظم کے لیے ابھی کسی نام پر اتفاق نہیں ہوا ، تاہم وزیراعلیٰ خیبرپختونخواہ کےلیے علی امین گنڈاپور کو نامزد کیا ہے۔ دھاندلی کے خلاف آوازاٹھانےوالی تمام جماعتوں کو اکٹھا کررہے ہیں، منی لانڈرنگ سنڈیکیٹ کو لانے کی کوشش ہورہی ہے اور شریف خاندان ملک کا سب سے بڑا منی لانڈرر ہے۔

بنی گالہ منتقلی کی تردید کرنے والے عمران خان نے ایک سوال کے جواب میں کہا کہ پی پی پی،ن لیگ اورایم کیوایم سے اتحاد نہیں ہوسکتا۔ ایسی دھاندلی ملکی تاریخ میں کبھی نہیں ہوئی۔ نوازشریف کی پریس کانفرنس ملتوی ہونے پرسمجھ گئے تھے کہ ہم جیت گئے، نواز شریف اور مریم نواز دونوں الیکشن ہارے ہیں۔

عمران خان نے مزید کہا کہ جیل میں کسی بھی اعلیٰ عہدےدارسے کوئی ملاقات نہیں ہوئی۔عالیہ حمزہ نے جیل میں بیٹھ کر ایک لاکھ سے زائد ووٹ لیے۔