بانی چیئرمین پی ٹی آئی کا سائفر اور توشہ خانہ کیس میں سزا کے خلاف عدالت سے رجوع

بانی چیئرمین پی ٹی آئی عمران خان کی سائفر اور توشہ خانہ کیس میں سزا کے خلاف اسلام آباد ہائی کورٹ میں اپیلیں دائر کر دیں، جبکہ عدت کیس کی اپیل سیشن کورٹ میں دائر کی ہے۔

عمران خان کے وکیل لطیف کھوسہ نے سابق چیئرمین پی ٹی آئی کو توشہ خانہ اور سائفر کیس میں ملنے والی سزاؤں کے خلاف اسلام آباد ہائیکورٹ میں اپیلیں دائر کرنے کی تصدیق کی۔

لطیف کھوسہ کا کہنا تھا کہ عدت کیس کی اپیل سیشن کورٹ میں دائر کی گئی ہے۔ سزا معطلی اور اپیلوں کی جلد سماعت کیلئے متفرق درخواستیں بھی دائر کی ہیں، چیف جسٹس سے اپیل ہے کہ ان درخواستوں کو جلد سماعت کیلئے مقرر کریں 

آفیشل سیکرٹ ایکٹ کی عدالت نے عمران خان کو سائفر کیس میں 30 جنوری کو 10 سال قید بامشقت کی سزا سنائی تھی جبکہ احتساب عدالت نے بانی پی ٹی آئی اور بشری بی بی کو توشہ خانہ کیس میں 31 جنوری کو سزا سنائی تھی۔