جیل انتظامیہ نے پی ٹی آئی رہنماؤں کو بانی چیئرمین سے ملاقات سے روک دیا

پی ٹی آئی کے نامزد وزارت عظمیٰ کے امیدوار عمر ایوب نے کہا ہے کہ بانی پی ٹی آئی سے ملاقات کی اجازت نہ دینا قابل مذمت ہے۔

اڈیالہ جیل راولپنڈی کے باہر میڈیا سے گفتگو کرتے ہوئے عمر ایوب کا کہنا تھا کہ عدالت عظمی کے آرڈرز لے کر ہم اڈیالہ جیل کے باہر کھڑے ہیں تاکہ عمران خان سے مل سکیں مگر ہمیں اندر جانے کی اجازت نہیں مل رہی جس ملک میں ایک جیل سپریڈینڈیٹ عدالتی احکامات کو ہوا میں اڑا دیتا ہو وہاں استحکام کیسے آئے گا۔ ہمیں ہمارا حق نہیں دیا جا رہا ہم انصاف کے لیے کس عدالت میں جائیں.

انہوں نے کہا کہ انٹرا پارٹی انتخابات آ رہے ہیں، اپنے لیڈر سے ملاقات کرنی ہے، عدالت نے آج بانی پی ٹی آئی سے ملاقات کرنے کی اجازت دی، جج صاحب کا آرڈر اڈیالہ جیل کی انتظامیہ کو بھیج رکھا ہے۔ ہمیں بانی پی ٹی آئی سے ملاقات کی اجازت نہیں دی جا رہی، پنجاب حکومت اور جیل انتظامیہ کس چیز سے خائف ہیں؟ ہمیں ہمارا حق نہیں دیا جا رہا، ہم اپنے حق کیلئے سپریم کورٹ جائیں یا عالمی عدالت جائیں۔

عمر ایوب کا کہنا تھا کہ بانی پی ٹی آئی نے مجھے وزارت عظمیٰ کا امیدوار نامزد کیا ہے، ہمیں آئینی و قانونی حق کیوں نہیں دیا جا رہا، ہم دوبارہ جا کر عدالت کا دروازہ کھٹکھٹائیں گے۔