حکومت نے بجلی کی قیمتوں میں اضافہ فی الوقت موخر کردیا

معاون خصوصی برائے خزانہ ڈاکٹر وقار مسعود نے  صحافیوں سے گفتگو کرتے ہوئے کہا کہ  آئندہ بجٹ میں عوم پر بوجھ نہیں ڈالا جائے گا،  جو لوگ پہلے سے ٹیکس نیٹ میں ہیں ان پر جس حد تک ممکن ہوا اضافی بوجھ نہیں ڈالا جائے گا،ٹیکس نیٹ کو بڑھائیں گے، اخراجات کو کم کریں گے۔

ڈاکٹر وقار مسعود نے کہا کہ  کورونا کی وجہ سے آئی ایم ایف پروگرام کے 4 جائزے تعطل کا شکار رہے،آئی ایم ایف سے کہا کہ اشیاء خوردونوش کی مہنگائی ہے اس میں مدد کی جائے،  خوراک کی مہنگائی کے حوالے سے آئی ایم ایف سہولت دے گا، آئی ایم ایف کی باقی شرائط پر عملدرآمد کیا جائے گا۔ سیلز ٹیکس میں کمی کی تجویز زیر غور ہے،وزیر خزانہ سیلز ٹیکس پر انعامی اسکیم لانے کی تجویز دے رہے ہیں۔

معاون خصوصی برائے خزانہ کا کہنا تھا کہ بجلی کی قیمتوں میں اضافہ فی الوقت موخر کردیا گیا ہے،آئی ایم ایف سے کہا گردشی قرضہ بڑھنے نہیں دیا جائے گا،پاور ہولڈنگ کمپنیوں کے 800 ارب روپے گردشی قرضوں کا بڑا حصہ ہیں، حکومت پی ایچ پی ایل کے قرضوں کی ادائیگی بجٹ سے کریگی۔