آرمی چیف اور بل گیٹس کے درمیان ٹیلیفونک رابطہ، انسداد پولیو پر تبادلہ خیال

پاک فوج کے شعبہ تعلقات عامہ کے مطابق بل گیٹس سے گفتگو کرتے ہوئے آرمی چیف جنرل قمر جاوید باجوہ نے کہا  کہ انسداد پولیو قومی  فریضہ  اور قومی کاوش ہے، پاکستان میں جب کوئی ایک بھی بچہ پولیو سے متاثر نہیں ہوگا تو اسے کامیابی کہیں گے۔جنرل قمر جاوید باجوہ نے کہا کہ انسداد پولیو کیلئے پولیو ٹیمز، قانون نافذ کرنے والے اداروں سمیت سب کی کوششیں کار فرما ہیں۔

آئی ایس پی آر کا کہنا ہے کہ  بل گیٹس نے پولیو کے سدباب کی مہم میں پاک فوج کے تعاون کو سراہا۔ آرمی چیف  نے  دنیا سے انسداد پولیو کیلئے بل گیٹس اور ان کی فاؤنڈیشن کے کردار  کی تعریف کی۔

دوسری جانب آرمی چیف جنرل قمر جاوید باجوہ سے روس کے سفیر کی ملاقات ہوئی ، جس میں  پاک روس دو طرفہ دفاعی تعاون، افغان امن عمل، علاقائی و عالمی امور پر بات چیت ہوئی ۔ آئی ایس پی آر کے مطابق   روس کے سفیر سے گفتگو کرتے ہوئے آرمی چیف نے کہا ہے کہ پاکستان پرامن افغانستان کا حامی ہے، افغانستان  میں قیام امن کے لیے مشترکہ کوششوں کی ضرورت ہے۔آرمی چیف جنرل قمر جاوید باجوہ کا کہنا تھا کہ پاکستان روس کے ساتھ اپنے دفاعی تعاون کو قدر کی نگاہ سے دیکھتا ہے۔ آرمی چیف نے روسی وزیر خارجہ کے دورہ پاکستان کو خوش آئند قرار دیا۔ روسی سفیرنے افغان امن کے لیے پاکستان کی کوششوں کو سراہا ۔