خیبر پختونخوا: سیکیورٹی فورسز کی الگ الگ کارروائیاں،24 بھارتی اسپانسرڈ خارجی جہنم واصل

راولپنڈی:خیبرپختونخوا میں سیکیورٹی فورسز نے دوالگ الگ کارروائیوں کے دوران بھارتی حمایت یافتہ فتنہ الخوارج کے 24 دہشت گرد مارے گئے۔

پاک فوج کے شعبہ تعلقات عامہ نے بتایا ہے کہ سیکیورٹی فورسز نے ضلع اورکزئی میں خوارج کی موجودگی کی اطلاع پر فوری حرکت میں آتے ہوئے انٹیلی جنس بیسڈ آپریشن کیا۔

ترجمان کے مطابق آپریشن کے دوران فوجی دستوں نے مؤثر طریقے سے خوارج کے ٹھکانے کو نشانہ بنایا اور 14 خوارج کو جہنم واصل کر دیا۔

آئی ایس پی آر نے مزید بتایا کہ سیکیورٹی فورسز نےخفیہ اطلاع پر دوسری کارروائی ضلع خیبر میںکی اس دوران ہونے والے فائرنگ کے تبادلے میں مزید 10 خوارج کو ہلاک کر دیا گیا۔

ترجمان آئی ایس پی آر کے مطابق علاقے میں موجود کسی بھی بھارتی سرپرستی میں کام کرنے والے خارجی کے خاتمے کے لیے کلیئرنس آپریشنز جاری ہیں۔

ترجمان نے مزید کہا کہ قومی ایکشن پلان کے تحت وفاقی ایپکس کمیٹی سے منظور شدہ وژن عزمِ استحکام کے تحت پاکستان کی سیکیورٹی فورسز اور قانون نافذ کرنے والے ادارے غیر ملکی حمایت یافتہ دہشت گردی کے ناسور کے مکمل خاتمے تک اپنی انسداد دہشت گردی مہم پوری رفتار سے جاری رکھیں گے۔