باتوں پر یقین نہیں رکھتے، کام کر کے دکھائیں گے، علی امین گنڈا پور

پاکستان تحریک انصاف کے رہنما اور نامزد وزیر اعلیٰ خیبر پختونخوا علی امین گنڈا پور نے کہا ہے کہ باتوں پر یقین نہیں رکھتے، کام کر کے دکھائیں گے، گڈ گورننس سے خود کو ثابت کریں گے۔انتخابات نے پارٹی کے ساتھ مخلص رہنے والوں اور مفاد پرستوں کی شناخت کرائی۔

نامزد وزیرا علیٰ علی امین گنڈا پور نے کہا ہے کہ ارکان اسمبلی کے حلف لینے کے بعد بانی پی ٹی آئی سے وزراء کے ناموں کی حتمی منظوری لی جائے گی، میرا مشن عوام کو زیادہ سے زیادہ ریلیف دینا ہے۔ اپنے ویژن کے مطابق عوامی بجٹ دیں گے۔

انہوں نے مزید کہا کہ صوبے میں امن و امان کے قیام، صحت کارڈ کی بحالی اور تعلیمی نظام کی بہتری پر توجہ دیں گے، ہم اپنے پلان کوعملی طور پر لاگو کرکے دوربارہ میدان میں اتریں گے۔

علی امین گنڈا پور نے کہا کہ حالیہ الیکشن جیتنے والے پی ٹی آئی کے 55 فیصد نئے ارکان اسمبلی میں پہنچے ہیں اور ان انتخابات نے پارٹی کے ساتھ مخلص رہنے والوں اور مفاد پرستوں کی شناخت کرائی۔

علی امین گنڈاپورکا کہنا تھا کہ بانی پی ٹی آئی نے پہلے بھی اپنی مرضی سے ایسی ٹیم کا انتخاب کیا تھا جو ورلڈکپ جیت چکی تھی اس بار بھی کارکردگی کی بنیاد پر بانی پی ٹی آئی  ارکان کو ذمہ داریاں دیں گے۔