ملکی معیشت چل پڑی ہے ، اچھا وقت آرہا ہے: وزیراعظم

تفصیلات کے مطابق وزیراعظم عمران خان نے رشکئی اقتصادی زون کے سنگِ بنیاد کی تقریب سے خطاب میں کہا کہ وہ کہتے تھے کہ گھبرانا نہیں تو عوام گھبرا جاتے تھے، مشکل وقت آتے رہتے ہيں ، جس طرح ہم کورونا سے نکلے شاید ہی تین چار ملک نکلے ہوں گے۔ انہوں نے کہا کہ جی ڈی پی گروتھ پر مخالفین بھی حیران ہیں، ہم دھاندلی سے جیتنے والے نہیں ، نیوٹرل امپائر سے جیتنے والے ہیں۔

وزیراعظم نے کہاکہ  آج پاکستان کیلئے خوش آئند دن ہے، سپیشل اکنامک زون بن رہا ہے ۔پاکستان کا مستقبل انڈسٹریلائزیشن میں ہے، صنعتوں سے ملکی دولت میں اضافہ ہوتا ہے، دنیا میں تیزی سے ترقی کرنے والا ملک چین ہے، چین کی اقتصادی ترقی سے پاکستان بہت کچھ سیکھ سکتا ہے۔ وزیراعظم  نے وزیر اعلیٰ خیبر پختونخوا کو رشکئی اکنامک زون کے متعلق  خبردار  کرتے ہوئے کہا کہ 'اس کی زمین کسی صورت فروخت نہ کی جائے بلکہ کم قیمت پر لیز پر دیا جائے، کیونکہ یہ زمین فروخت کی گئی تو یہ ریئل اسٹیٹ بننے کا خطرہ ہے۔ ان  کا کہنا تھا کہ 'پاکستان میں برآمدات میں اضافے کے لیے صنعتیں لگانے کی ضرورت ہے، چین کی برآمدات میں اضافہ صنعتیں لگانے سے ہوا اور جب تک برآمدات میں اضافہ نہیں ہوتا ملک ترقی نہیں کرے گا'۔

وزیراعظم نے کہا کہ بدقسمتی سے اب تک ہمارا شمار سرمایہ کاروں کو سہولت فراہم کرنے والے ممالک میں نہیں ہوتا، اسپیشل اکنامک زون میں سرمایہ کاروں کو سہولت دیں گے، سرمایہ کاروں کے لیے جتنی آسانیاں ہوں گی اتنی زیادہ سرمایہ کاری ہوگی۔وزیراعظم نے مزید کہا کہ   ہم نے ملک کو مشکل وقت سے نکالا ہے اور جب اس مشکل وقت سے معیشت کو نکال رہے تھے تو کورونا آگیا،لاک ڈاؤن نہ لگانے کا فیصلہ بروقت کیا ، لاک ڈاون کے لیے مجھ پردباؤ ڈالا گیا، اگر لاک ڈاؤن لگا دیتا تو آج بھارت جیسا حال ہوتا۔ان کا کہنا تھا کہ ملک ترقی کے راستے پر چل پڑا ہے اور اچھا وقت آنے والا ہے، صنعت بھی چل پڑی ہے، اس مرتبہ چاول، گندم اور مکئی کی ریکارڈ پیداوار ہوئی ہے، اب ملک میں ڈالر زیادہ آرہے ہیں اور باہر کم جارہے ہیں۔ ڈھائی سال پہلے پاکستان بینک کرپٹ تھا،قرضہ بڑھا ہوا تھا، اللہ کا شکر ہے ہم مشکل دور سے نکلے، ملک کو معاشی استحکام دیا۔