خریدوفرخت کی بین الاقوامی ویب سائٹ پر چھینے ہوئے آئی فون فروخت ہونے کا انکشاف

تفصیلات کے مطابق   ماڈل تھانہ فیروزآباد نے انتہائی مطلوب 3 رکنی بین الصوبائی گروہ کو گرفتار کرلیا ہے۔

ایس ایس پی ایسٹ کا کہنا ہے کہ  گرفتار ملزمان سے 35 آئی فون اور 3 پستول برآمد ہوئے ہیں ، گروہ کا سرغنہ شوکت کی چنیوٹ میں دکان ہے،  گروہ کے2 کارندے موبائل کراچی سے چھینتے ہیں۔

ایس ایس پی ایسٹ ساجد امیر سدوزئی کے مطابق   ملزم نے خرید و فروخت کی ویب سائٹ پر جعلی آئی ڈی بنا رکھی ہے، ملزمان اب تک ڈیڑھ کروڑ سے زائد کے 100 آئی فون فروخت کرچکے ہیں۔ ملزمان سوشل میڈیا صارف کی ڈیمانڈ پر مطلوبہ فون بھی چھینا کرتے تھے، چھینے ہوئے آئی فون کو کارآمد بناکر ویب سائٹ پر اپلوڈ کردیا جاتا تھا۔

ایس ایس پی ایسٹ کا کہنا ہے کہ   درجنوں فون کھول کر پارٹس کی صورت میں بھی فروخت کیے ہیں ، ملزمان پاکستان کے تمام صوبوں اور شہروں میں موبائل فون فروخت کرچکے ہیں۔ سب سے زیادہ کسٹمر لاہور ، سرگودھا فیصل آباد اور چنیوٹ سے ہیں۔

 ایس ایس پی ایسٹ ساجد امیر سدوزئی نے مزید کہا کہ معرف کورئیرسروس کے ذریعے چوری کے فون پارسل کیے جاتے،  پیسے بذریعہ ایزی پیسہ وصول کیے جاتے تھے، کراچی پولیس کی چنیوٹ اور لاہور سمیت مزید شہروں میں بھی دیگر ملزمان کی تلاش جاری ہے۔