عمران خان وزیراعظم ہیں اور وہ ہی تمام فیصلےکرتے ہیں ، فواد چوہدری

غیر ملکی خبر رساں ادارے کو انٹرویو دیتے ہوئے وفاقی وزیر اطلاعات فواد چوہدی کا کہنا تھا کہ  وزیراعظم عمران خان پاکستان میں مقبول ترین رہنما ہیں، پاکستان کے عوام نے انہیں ووٹ دیئے اور ان کے پرستار ہیں۔آئندہ عام انتخابات میں بھی وزیراعظم عمران خان کامیابی حاصل کریں گے۔

وفاقی وزیر اطلاعات نے کہا کہ  منتخب حکومت کو کمزور نہ سمجھا جائے، عمران خان نے گزشتہ عام انتخابات میں لاکھوں ووٹ حاصل کئے، عمران خان ایک ایٹمی ملک کے وزیراعظم ہیں، وہ اور ان کی کابینہ اجتماعی فیصلے کرتے ہیں۔

فواد چوہدری نے انٹریو میں کہا کہ  بھارت پوری دنیا میں تاثر پھیلاتا ہے کہ پاکستان میں ہر کام فوج کے کہنے پر کیا جاتا ہے، یہ بالکل غلط اور بے بنیاد بات ہے۔ عمران خان وزیراعظم ہیں اور وہ ہی تمام فیصلےکرتے ہیں، اسٹیبلشمنٹ سسٹم کا حصہ ہے اور ہمارے اُس کے ساتھ بہت اچھےتعلقات ہیں۔

وزیر اطلاعات   نے کہا کہ  کووڈ 19 بحران کے باوجود اس وقت ملک کی شرح نمو 3.94 فیصد ہے،تقریباً 1100 ارب روپے اربن اکانومی سے رورل اکانومی میں منتقل ہوئے ہیں۔اس سال پاکستان میں چار بمپر فصلیں ہوئیں، کسانوں کی جانب سے بڑی تعداد میں ٹریکٹرز خریدے گئے۔کووڈ 19 کے حوالے سے پاکستان کا ردعمل پوری دنیا میں سب سے بہتر رہا ہے اور  اقوام متحدہ کی جنرل اسمبلی کے صدر نے وبا سے متعلق پاکستان کے اقدامات کو مثالی قرار دیا ہے۔

وفاقی وزیر اطلاعات فواد چوہدی کا مزید کہنا تھا کہ  ملک میں 5.5 ملین افراد کو ویکسین لگائی جا چکی ہے۔ عوام کو ویکسین لگوانے کے حوالے سے پاکستان دنیا کے صف اول کے 34 ممالک میں شامل ہے۔ ہم ویکسینیشن کے اہداف جلد حاصل کرلیں گے۔کووڈ 19 کی صورتحال سے نمٹنے کے لئے پاکستان کی کامیابی جزوی لاک ڈاﺅن کی حکمت عملی ہے، پاکستان میں خطے کے کسی دوسرے ملک کے مقابلے میں صورتحال کافی بہتر ہے۔