لاہور سمیت پنجاب کے مختلف علاقوں میں بادل برس پڑے

لاہور: صوبائی دارالحکومت لاہور سمیت ملک کے مختلف علاقوں میں ہونے والی بارش سے موسم انتہائی دلفریب ہو گیا۔

بارش کے باعث سردی کی شدت میں اضافہ ہوگیا ہے، محکمہ موسمیات نے آئندہ 24 گھنٹوں میں مزید بارش کی پیشگوئی کردی ہے۔

لاہور کے علاقے گوالمنڈی، ایبٹ روڈ، شملہ پہاڑی، لکشمی چوک، مال روڈ، ہال روڈ، ساندہ، کرشن نگر، چوبرجی، جیل روڈ، مزنگ، گلبرگ، شادمان، کینٹ، مسلم ٹاؤن، فیروزپور روڈ سمیت دیگر علاقوں میں رات گئے شروع ہونے والی بوندا باندی صبح تک جاری رہی۔

دوسری جانب کراچی میں آج باد جم کر برسیں گے، رین ایمرجنسی نافذ کرتے ہوئے تمام بلدیاتی اداروں، انتظامیہ اور ہسپتالوں کو ہائی الرٹ رہنے کا حکم دیدیا گیا ہے۔

سندھ بھر میں شدید بارشوں کے پیش نظر پورے صوبے میں آج ایوننگ شفٹ کے تمام تعلیمی ادارے بند رہیں گے۔

بھکر، چشتیاں، لیاقت پورہ، گوجرہ، شرقپورہ، حافظ آباد، بہاولپور، جھنگ اور چنیوٹ میں بھی بادل برسے جبکہ کمالیہ میں بارش کے باعث خستہ حال گھر کی چھت گر گئی جس کے نتیجے میں تین افراد جان کی بازی ہار گئے۔