وزیر داخلہ محسن نقوی نے خیبرپختونخوا میں امن وامان قائم رکھنے کیلئے مکمل تعاون کی یقین دہانی کرائی ہے۔

انہو ں نے گورنر خیبرپختونخوا فیصل کریم کنڈی سے آج (منگل) اسلام آباد میں ملاقات میں کہا کہ صوبے کی پولیس، ایف سی اور محکمہ انسداد دہشت گردی کو جدید ٹیکنالوجی اور ہتھیاروں سے لیس کیا جارہا ہے۔

محسن نقوی نے دہشت گردی کے خلاف جنگ میں قانو ن نافذ کرنے والے اداروں کی قربانیوں کو سراہتے ہوئے کہا کہ اس ناسور کیخلاف جنگ میں کامیابی ہی واحد حل ہے۔ وزیرداخلہ نے قوم کی حمایت سے دہشت گردی کے مکمل خاتمے کے عزم کا اظہار کیا۔

وزیراعلیٰ سندھ سید مراد علی شاہ نے کمانڈنگ آفیسر ترکش نیوی شپ ٹی سی جی کنالیاڈا اورکمانڈر سیرکن ڈوگان سے ملاقات کی۔

 وزیراعلیٰ سندھ نے کمانڈر سیرکن ڈوگان، بحری جہاز اور عملے کو کراچی ایئر پورٹ آمد پر خوش آمدید کہا۔

ترجمان وزیراعلیٰ سندھ کے مطابق ملاقات میں پیشہ ورانہ امور پر بات چیت کی گئی۔

وزیراعلیٰ سندھ نے کہا کہ پاکستان کی عوام ترکی کے ساتھ تعلقات کو بہت محبت اور احترام کے ساتھ دیکھتی ہے۔

فلسطینی وزارت صحت نےکہا ہے غزہ کی پٹی کو پولیو کی وبا کے علاقے کے طور پر درجہ بندی کر دیا گیا ہے۔ کئی برسوں کے بعد غزہ میں بڑی تعداد میں پولیو کے کیسز سامنے آئے ہیں جس کے بعد علاقے کو پولیو زدہ قرار دیا گیا ہے۔

یہ درجہ بندی اسرائیلی جارحیت کی وجہ سے غزہ کی پٹی میں بگڑتے ہوئے انسانی حالات کے نتیجے میں سامنے آئی ہے۔

اسرائیلی بربریت اور امریکی مدد سے جاری جنگی مشین کے نتیجے میں بنیادی ڈھانچے کی تباہی، رہائشیوں کو قابل استعمال پانی سے محرومی، کوڑا کرکٹ کے جمع ہونے اورغذائی عدم تحفظ جیسے سنگین مسائل کا سامنا ہے۔