ہم آئینی طریقہ کار اپنا کر احتجاج کرتے رہیں گے، بیرسٹر گوہر

تحریک انصاف کے منتخب چیئرمین بیرسٹر گوہر نے کہا ہے کہ قومی اسمبلی کا بائیکاٹ نہیں کریں گے، سیاسی و جمہوری عمل میں جگہ خالی نہیں چھوڑتے۔

پارلیمنٹ کے باہر میڈیا سے گفتگو کرتے ہوئے بیرسٹر گوہر نے کہا کہ اسمبلی کو کبھی جعلی نہیں کہا لیکن قانونی بھی نہیں مانتے۔ پارلیمانی لیڈر اور اپوزیشن لیڈر سے متعلق فیصلے جلد کریں گے۔موجودہ حکومت کے پاس اہلیت نہیں ہے، بڑی مشکل صورتحال ہے۔  پاکستان میں صاف و شفاف انتخابات نہیں ہوئے،پوری دنیا اس کی گواہی دے رہی ہے ۔

پی ٹی آئی کے منتخب چیئرمین نے کہا کہ  ہم آئینی طریقہ کار اپنا کر احتجاج کرتے رہیں گے، ایوان میں  کارروائی بھی ہوگی اور احتجاج بھی ہوگا،آج جمہوریت کیلئے ایک سیاہ دن ہے جن لوگوں کو ایوان میں نہیں ہونا چاہئے تھا وہ ایوان میں بیٹھے ہیں ۔

بیرسٹر گوہر کا کہنا تھا کہ ہمارا کردار مثبت ہوگا ، ہم آئین اور قانون کے دائرے میں رہ کر آگے بڑھیں گے اور ہم ملک کی بہتری کیلئے کام کریں گے۔

اسد قیصر نے کہا کے موجودہ حکومت کے پاس جعلی مینڈیٹ ہے، آج جعلی وزیر اعظم کا انتخاب ہو گا۔ احتجاج سمیت تمام آپشنز استعمال کریں گے۔