پنجاب اور کے پی کی نئی کابینہ آج حلف اٹھائیں گی

لاہور/پشاور: پنجاب کابینہ کی حلف برداری آج شام 4 بجے گورنر ہاؤس لاہور میں ہوگی جس کے پہلے مرحلے میں پنجاب کابینہ میں شامل 15 کے قریب وزراء حلف اٹھائیں گے۔

خیبرپختونخوا کے نامزد وزراء بھی آج حلف اٹھائیں گے۔ حلف برداری کی تقریب شام 6:30 بجے گورنر ہاؤس پشاور میں ہوگی، جہاں گورنر خیبرپختونخوا نئی کابینہ سے حلف لیں گے۔

ذرائع کے مطابق مریم اورنگزیب کو منصوبہ بندی و ترقیات اور جنگلات کی وزارت ملنے کا امکان ہے جب کہ عظمیٰ بخاری کو پنجاب کی وزیر اطلاعات مقرر کیا جائے گا۔

ذرائع کا کہنا ہے کہ خواجہ عمران نذیر پرائمری ہیلتھ، بلال یاسین فوڈ، مجتبی شجاع ایکسائز، خالد جاجا محکمہ زراعت اور فیصل ایوب ہاؤسنگ اینڈ سپورٹس کے وزیر ہوں گے۔

ذرائع کا مزید کہنا ہے کہ سلمان نعیم اور رانا اسکندر حیات کو بھی وزیر بنائے جانے کا امکان ہے۔