چیئرمین پی سی بی محسن نقوی نے راولپنڈی کرکٹ اسٹیڈیم کی اپ گریڈیشن کا پلان طلب کر لیا

راولپنڈی: چیئرمین پی سی بی محسن نقوی نے راولپنڈی کرکٹ سٹیڈیم کی اپ گریڈیشن کا پلان طلب کر لیا۔

چیئرمین پی سی بی نے علی الصبح راولپنڈی کرکٹ سٹیڈیم کا دورہ کیا اور سٹیڈیم میں شائقین کرکٹ کے لئے سہولتوں کا جائزہ لیا۔ انہوں نے راولپنڈی کرکٹ سٹیڈیم کو عالمی معیار کا سٹیڈیم بنانے کے لیے پلان جلد تیار کرنے کی ہدایت کی اور کہا سٹیڈیم کے انکلوژر میں سہولتوں کو مزید بہتر بنایا جائے۔

انہوں نے ہدایت کی کہ سٹیڈیم میں عارضی نشتوں کی بجائے مستقل نشستیں لگانے کا بندوبست کیا جائے اور گراؤنڈ کی حالت کو بھی بہتر بنایا جائے۔

چیئرمین پی سی بی نے سٹیڈیم کے مختلف حصے دیکھے اور ضروری ہدایات دیں ۔ چیف آپریٹنگ آفیسر پی سی بی سلمان نصیر نے انہیں بریفنگ دی ، اس موقع پر چیف سلیکٹر وہاب ریاض بھی موجود تھے ۔