سول سوسائٹی کا جموں وکشمیر پر انڈیا کے غیر قانونی تسلط کے خاتمے کا مطالبہ

بھارت کے غیر قانونی زیر قبضہ جموں و کشمیر میں سول سوسائٹی نے جموں وکشمیر پر بھارت کے غیر قانونی تسلط کے خاتمے اور دفعہ 370اور 35Aکی بحالی کا مطالبہ کیا ہے۔

کشمیر میڈیا سروس کے مطابق سول سوسائٹی کے نمائندوں نے سرینگر میں ایک اجلاس میں کشمیریوں پر بھارتی مظالم کاسلسلہ فوری بند کرانے اور اقوام متحدہ کی متعلقہ قراردادوں کے مطابق تنازعہ کشمیر کے حل پر زور دیا۔

کل جماعتی حریت کانفرنس نے جموں وکشمیر کے بارے میں ہٹ دھرمی پر مبنی موقف اور اس دیرینہ تنازعے کے حل سے مسلسل انکار پر بھارت پر کڑی تنقید کی۔

حریت کانفرنس نے ایک بیان میں اقوام متحدہ کے زیر نگرانی رائے شماری کے ذریعے کشمیریوں کو انکا ناقابل تنسیخ حق خودارادیت دینے پر زوردیا۔

کشمیریوں نے آج آزاد جموں و کشمیر کے پہلے منتخب صدر کے ایچ خورشید کی آج 36 ویں برسی منائی اور کشمیر کاز اور حق خود ارادیت کے حصول کی جدوجہدمیں انکی نمایاں خدمات پر انہیں شاندار خراج عقیدت پیش کیا۔

یاد رہے کہ معروف  رہنما کی یاد میں آزاد جموں و کشمیر اور پاکستان بھر میں خصوصی تقاریب منعقد کی گئیں ۔