پوری قوم دہشت گردی کے خاتمے کیلئے متحد ہے ،وزیر دفاع

وزیر دفاع خواجہ محمد آصف نے کہا ہے کہ پوری قوم دہشت گردی کے ناسور کے خاتمے کیلئے متحد ہے اور سیکیورٹی فورسز ملک میں امن اور استحکام کیلئے بے مثال قربانیاں دے رہی ہیں۔

انہوں نے اتوار کے روز سیالکوٹ میں صحافیوں سے گفتگو کرتے ہوئے کہا کہ شہداء ہمارے اصل ہیرو ہیں جنہوں نے وطن عزیز کے دفاع کیلئے اپنی جانیں قربان کیں۔

وزیر دفاع نے شمالی وزیرستان کے علاقے میر علی میں دہشت گردوں کے بزدلانہ حملے کی شدید مذمت کی۔انہوں نے بعض عناصر کی جانب سے شہداء کے خلاف سوشل میڈیا مہم کی بھی مذمت کی اور کہا کہ دہشت گردی کے خلاف جنگ میں اتحاد کی ضرورت ہے۔ایک سوال کے جواب میں انہوں نے کہا کہ پاکستان کو معاشی بحران کا سامنا ہے اور ایک سیاسی جماعت نے عالمی مالیاتی فنڈ کو خط لکھا ہے جو قابل ِ افسوس ہے۔وفاقی وزیر نے کہا کہ حکومت ملک کو معاشی بحران سے نکالنے اور اسے ترقی اور خوشحالی کی راہ پر گامزن کرنے کیلئے پُرعزم ہے۔ایک سوال کے جواب میں انہوں نے افسوس ظاہر کیا کہ پاکستان میں دہشت گردی کیلئے افغان سرزمین استعمال کی جا رہی ہے۔

انہوں نے کہا کہ کچھ سہولت کاروں کا سراغ مل گیا ہے اور پاکستان نے افغانستان کی حکومت کے ساتھ معاملہ اٹھایا ہے۔انہوں نے کہا کہ جن لوگوں کے پاس قانونی دستاویزات نہیں ہیں انہیں پاکستان میں نہیں رہنے دیا جائیگا۔