آرمی چیف کا کمانڈ اینڈ اسٹاف کالج کوئٹہ کا دورہ

پاک فوج کے شعبہ تعلقات عامہ (آئی ایس پی آر) میجر جنرل بابر افتخار کے مطابق آرمی چیف جنرل قمر جاوید باجوہ نے کمانڈ اینڈ اسٹاف کالج کوئٹہ کا دورہ کیا۔ کور کمانڈر کوئٹہ لیفٹنٹ جنرل سرفراز علی اور کمانڈنٹ سٹاف کالج میجر جنرل عامر احسن نواز نے آرمی چیف کا استقبال کیا ۔

آئی ایس پی آر کے مطابق آرمی چیف نے اسٹاف کورس 21-2020کے شرکا سے خطاب کیا۔آرمی چیف نےپیشہ ورانہ امور،علاقائی سلامتی وسکیورٹی صورتحال سے متعلق امور پر اظہار خیال بھی کیا۔

آرمی چیف جنرل قمر جاوید باجوہ نے کہا کہ  خطہ میں امن کا دارومدار طویل عرصہ سے تعطل کا شکار مسائل کے حل میں پوشیدہ ہے، پاکستان نےبھرپور عزم اورقوم کی مدد سےدہشت گردی کے عالمی مسئلہ پرقابو پایا۔آرمی چیف نے دہشت گردی کی لعنت سے بطور قوم نبردآزما ہونے کے عزم کا اعادہ کیا۔

آرمی چیف کا کہنا تھا کہ  عالمی برادری کے تعاون سے مسائل کو حل کیا جاسکتا ہے،پیچیدہ چیلنجزسے نمٹنے کے لیے سنجیدہ عزم درکار ہے،کورونا وبا سے نمٹنےکیلئےپاک فوج دیگر ریاستی اداروں کے ساتھ کوشاں ہے ،پاکستان کو در پیش چیلنجز سے نمٹنے کے لیے ہرممکن کوشش کریں گے،جامع مربوط قومی کوششوں سے ہی پاکستان میں ترقی و استحکام ممکن ہوگا۔