حکومت معاشی مسائل پر قابو پانے کیلئے تمام ممکنہ کوششیں کر رہی ہے، وزیر اطلاعات

اسلام آباد :  وزیر اطلاعات عطاء اللہ تارڑ نے معاشی اصلاحات کا ایجنڈا تیزی سے آگے بڑھانے کیلئے حکومت کے عزم کا اظہار کیا ہے۔

انہوں نے اسلام آباد میں ایک نیوز کانفرنس سے خطاب کرتے ہوئے کہا کہ حکومت وزیراعظم شہباز شریف کی قیادت میں معاشی مسائل پر قابو پانے کیلئے تمام ممکنہ کوششیں کر رہی ہے۔

عطا تارڑ  نے کہا کہ ان میںپی آئی اے اور ایئر پورٹس کی نجکاری، حکومت کے اخراجات کم کرنے اور ٹیکس کا دائرہ کار بڑھانے کی کوششیں شامل ہیں ، وزیر اطلاعات نے کہا وزیراعظم کی ہدایت پر وزراء رمضان پیکیج پر عملدرآمد کی نگرانی کیلئے یوٹیلیٹی سٹورز کے دورے بھی کر رہے ہیں۔

وفاقی وزیر اطلاعات نے غیر ملکی زرمبادلہ کے ذخائر بڑھانے میں کردار ادا کرنے والے افراد اور ٹیکس دہندگان کو ایوارڈز دینے کا اعلان کیا۔

انہوں نے کہا کہ اس سلسلے میں ایک تقریب جلد وزیراعظم ہائوس میں ہوگی۔ انہوں نے کہا کہ ٹیکس چوروں کے خلاف کارروائی کی جائے گی۔

انہوں نے کہا کہ ملکی معیشت کی بہتری کیلئے لائحہ عمل تشکیل دے دیا گیا ہے اور اس کے مثبت نتائج جلد نظر آنا شروع ہو جائیں گے۔