نواز شریف کی سیاست کی جگہ شہباز شریف نے لی ہے، شیخ رشید

عوامی مسلم لیگ کے سربراہ شیخ رشید احمد کا کہنا ہے کہ نواز شریف کی سیاست کی جگہ شہباز شریف نے لی ہے، پاکستان کو آگے جانا چاہیے، غریب کی حالت بہت خراب ہے، 27 رمضان کو مقتدر حلقے غریب لوگوں کے لیے معافی کا اعلان کریں۔

انسداد دہشت گردی عدالت راولپنڈی میں پیشی کے بعد میڈیا سے گفتگو میں سابق وزیر داخلہ شیخ رشید نے کہا کہ 9 مئی کے 3 مقدمات کی تین تین نقول ہمیں فراہم کردی گئی ہیں، ہمارے خلاف 9 مئی کے 17 کیس چل رہے ہیں، 11 کیسز دہشت گردی عدالت میں ہیں وہاں آئندہ سماعت پر بھی پیش ہوں گے۔

راولپنڈی : سابق وفاقی وزیر داخلہ شیخ رشید احمد کی انسداد دہشت گردی کی عدالت کے باہر میڈیا سے گفتگو pic.twitter.com/Xb5UZe0r3z

— Sheikh Rashid Ahmed (@ShkhRasheed) April 1, 2024

شیخ رشید نے مزید کہا کہ حکومت جنہوں نے چلانی ہے انہوں نے چلانی ہے، ہماری خاموشی رنگ لائے گی، ہم چاہتے ہیں غریب کا چولہا جلے، پاکستان کو آگے جانا چاہییے کیونکہ غریب کی حالت بہت خراب ہے۔

عوامی مسلم لیگ کے سربراہ کا کہنا تھا کہ 27 رمضان کو مقتدر حلقے غریب لوگوں کے لیے معافی کا اعلان کریں۔جو لوگ بے گناہ ہیں انہیں معافی ملنی چاہیئے۔

سابق وفاقی وزیر نے مزید کہا کہ بہت پہلے کہا تھا (ن) میں سے ش نکلے گی، نواز شریف کی سیاست کی جگہ شہباز شریف نے لی ہے، بہت پہلے کہا تھا شہباز شریف کی سیاست چلے گی نواز شریف کی نہیں۔