تصدق جیلانی کی ججز خط سے متعلق انکوائری کمیشن کی سربراہی کرنے سے معذرت

اسلام آباد: سابق چیف جسٹس تصدق جیلانی نے انکوائری کمیشن کی سربراہی کرنے سے معذرت کرلی۔

تصدق جیلانی نے وزیراعظم پاکستان کو خط میں معذرت کرلی۔اپنے خط میں انہوں نے کاہ کہ مجھ پر اعتماد کرنے پر وفاقی کابینہ کا مشکور ہوں۔

چیف جسٹس (ر) نصدق جیلانی نے مزید کہا کہ ذاتی مصروفیات کی وجہ سے انکوائری کمیشن کی سربراہی نہیں کرسکتا۔ سپریم جوڈیشل کونسل کے دائرہ اختیار میں آنے والے معاملے کو ایک انکوائری کمیشن نہیں دیکھ سکتا ، انکوائری کمیشن آرٹیکل 209 کے تحت معاملے کی تحقیقات نہیں کرسکتا ۔

واضح رہے کہ  25 مارچ کو اسلام آباد ہائی کورٹ کے چھ ججز نے سپریم جوڈیشل کونسل کو لکھے گئے ایک خط میں عدالتی امور میں آئی ایس آئی اور دیگر انٹیلیجنس اداروں کی طرف سے براہ راست مداخلت اور ججز پر دباؤ ڈالنے کے الزامات عائد کیے تھے۔

اس کے بعد چیف جسٹس قاضی فائز عیسیٰ نے نہ صرف وزیر اعظم شہباز شریف سے ملاقات کی بلکہ اس بات پر زور دیا کہ عدالتی امور میں مداخلت کو برداشت نہیں کیا جائے گا اور دونوں کےدرمیان انکوائری کمیشن کے قیام پر اتفاق ہوا تھا۔

بعدازاں 30 مارچ کو وزیراعظم شہبازشریف نے اسلام آباد ہائی کورٹ کے چھ ججز کے خط پر انکوائری کمیشن کی تشکیل کی منظوری دیتے ہوئے سابق چیف جسٹس تصدق حسین جیلانی کو انکوائری کمیشن کا سربراہ نامزد کیاتھا۔