علما ئے کرام کورونا ویکسی نیشن کیلئے خصوصی ترغیب دیں : صدر مملکت

تفصیلات کے مطابق کوورونا ویکسین پر ملک بھر کے علما و مشائخ کے ساتھ مشاورتی سیشن  سے خطاب کرتےہوئے صدر مملکت ڈاکٹر عارف علوی  نےکہاکہ  مساجد کے منبر اور محراب عوام کی تدریس کے لیے اہمیت رکھتے ہیں ، عوام الناس کی صحت کی حفاظت بنیادی مقصد ہے،کورونا وائرس کی وباء کے دوران میڈیا، حکومت اور علماء نے مل کر کام کیا۔  صدر مملکت نےعلما و مشائخ کو کورونا ویکسین پر اعتماد میں لیا۔ملک بھر سے مختلف مکاتبِ فکر کے جید علمائے کرام نے ویڈیو لنک کے ذریعے اجلاس میں شرکت کی.

علمائے کرام نے پاکستان میں رجسٹرڈ انسداد کورونا  ویکسین   کے اجزا پر اطمینان کا اظہار کیا۔صدر مملکت نے کہاکہ وہ تمام علمائے کرام جنہوں نے خود بھی ویکسین لگوائی ہے ،اگلے جمعہ کو اپنے خطبات میں لوگوں کو خاص طور پر کورونا ویکسینیشن کی اہمیت کے بارے میں  آگاہ کریں ۔ صدر ڈاکٹر عارف علوی نے کورونا صورتحال کو کامیابی کے ساتھ نمٹنے میں  علمائے کرام  کے کردار کی تعریف کی۔