پاکستان نے کورونا کے خلاف موثر اقدامات سے کامیابی حاصل کی: فواد چوہدری

تفصیلات کے مطابق وفاقی وزیر اطلاعات و نشریات چوہدری فواد حسین نے کہا ہے کہ پاکستان کی معیشت 4 فیصد کی شرح سے بڑھ رہی ہے،  انہوں نے کہا کہ پاکستان ایک پرامن اور خوبصورت ملک ہے، وزیراعظم کا سیاحت پر توجہ ہے، یہ شعبہ ہماری معیشت کے لئے گیم چینجر ثابت ہو سکتا ہے، سوئٹزرلینڈ ہمارے شمالی علاقوں کا نصف حصہ بنتا ہے مگر ہم سوئزرلینڈ کو اہمیت دیتے ہیں۔ انہوں نے کہا کہ ہمیں ترکی سے سیاحت کے شعبے کے حوالے سے سیکھنا چاہئے۔

وفاقی وزیر  نے کہا کہ دنیا بھر میں ہمارے سفارت خانوں کو اس سلسلے میں لوگوں کی رہنمائی کرنی چاہئے۔ انہوں نے کہا کہ ہمیں ویزا شرائط آسان کرنا ہوں گی، ویزا اور سیکورٹی کی صورت حال کو بہتر بنانا ہوگا اور پاکستان کے محفوظ ملک ہونے کے احساس کو اجاگر کرنا ہوگا۔وفاقی وزیر اطلاعات نے کہا کہ کے ٹو کے پہاڑ سے کراچی کے سمندر تک موسم کی تبدیلیوں کی مثال دنیا میں کہیں نہیں ملتی، پاکستان میں ہر طرح کے سیاحتی مقامات موجود ہیں، ہمیں سیاحت کے شعبے کی رکاوٹوں کا خاتمہ کرنا ہوگا۔ انہوں نے مزید کہاکہ ملک میں کورونا کی شرح 4 فیصد سے کم ہے۔ پاکستان نے جس طریقے سے کورونا وائرس کے حوالے سے اقدامات اٹھائے، اس پر فخر ہے۔ خطے کے دیگر ممالک اور بھارت کے مقابلے میں پاکستان میں کورونا کی صورتحال بہت بہتر ہے۔