آزادی مارچ کیس، بانی پی ٹی آئی سمیت دیگر ملزمان کی بریت کی درخواست پر فیصلہ محفوظ

آزادی مارچ کیس، بانی چیئرمین پی ٹی آئی عمران خان  شاہ محمود قریشی، شیخ رشید اور دیگر ملزمان کی بریت کی درخواست پر فیصلہ محفوظ کر لیا۔

ڈسٹرکٹ اینڈ سیشن کورٹس اسلام آباد کے جوڈیشل مجسٹریٹ ملک عمران نے بریت کی درخواست پر فیصلہ محفوظ کر لیا۔

سابق وفاقی وزیر شیخ رشید نے عدالت میں پیش ہو کر بریت کی درخواست دائر کر دی، شریک ملزمان علی نواز اعوان اور صداقت عباسی بھی عدالت میں پیش ہوئے۔

پی ٹی آئی کے وکلا سردار مسروف ایڈووکیٹ، آمنہ علی، رضوان اختر اعوان اور مرزا عاصم ایڈووکیٹ عدالت میں پیش ہوئے۔

سردار مسروف ایڈووکیٹ نے عدالت کو بتایا کہ گزشتہ سال فروری میں بریت کی درخواست دائر کی گئی تھی، ہم اس کیس میں بریت کی درخواست پر آج دلائل دینا چاہتے ہیں۔

جج ملک عمران نے ریمارکس دیئے کہ صداقت عباسی، علی نواز اعوان اور شیخ رشید کے چالان عدالت میں آچکے ہیں۔

سردار مسروف نے بتایا کہ یہ ایف آئی آر دفعہ 144 کے تحت درج کی گئی ہے، اس کیس میں کوئی ثبوت یا سی سی ٹی وی فوٹیج نہیں، مقدمہ متعلقہ شخص نے درج نہیں کیا۔

پرویز خٹک، اسد قیصر، اسد عمر، علی امین گنڈا پور بھی شریک ملزمان کی فہرست میں شامل ہیں۔

عدالت نے بانی پی ٹی آئی شیخ رشید اور دیگر ملزمان کی بریت کی درخواست پر فیصلہ محفوظ کر لیا۔

واضح رہے کہ ملزمان کے خلاف آزادی مارچ سے متعلق تھانہ آئی نائن میں مقدمہ درج ہے۔