حکومت کے پاس پاکستان کے لیے میثاقِ معیشت کا کوئی پلان نہیں،بابر اعوان

پاکستان تحریک انصاف کے رہنما بابر اعوان نے کہا ہے کہ جسٹس بابر ستار کی ججمنٹ کے بعد اسلام آباد ہائیکورٹ کو ختم کرنے کی کوششیں تیز ہو گئیں ہیں۔

اسلام آباد ہائی کورٹ کے باہر میڈیا سے گفتگو کرتے ہوئے بابر اعوان نے کہا کہ اس حکومت کے پاس پاکستان کے لیے میثاقِ معیشت کا کوئی پلان نہیں۔

انہوں نے کہا کہ ججز خط پر سپریم کورٹ کا فل بینچ بنایا جائے جو روزانہ کی بنیاد پر معاملے کی سماعت کرے، قوم کو معلوم ہونا چاہیے کہ یہ دھمکیاں کہاں سے آتی ہیں اور کون دیتا ہے؟

پی ٹی آئی رہنما نے کہا کہ اسلام آباد ہائیکورٹ کے ججز ہمارے ہیرو ہیں اور ان کا بھی تحفظ ہم کریں گے ، اسلام آباد کی انتظامیہ حکومت کے مخالفین کے پیچھے لگی ہوئی ہے۔

بابر اعوان نے مزید کہا کہ پورے اسلام آباد اور وفاق کے مقدمات سننے والے اسلام آباد ہائی کورٹ کو ختم کرنے کی سازش شروع ہو چکی،جسٹس بابر ستار کی ججمنٹ کے بعد اسلام آباد ہائی کورٹ کو ختم کرنے کی سازشیں تیز ہو گئی ہیں۔ 

انہوں نے کہا کہ اگر کسی نے اسلام آباد ہائی کورٹ ختم کرنےکی کوشش کی تو اس کو تاریخ ساز مذاحمت کا سامنا کرنا پڑے گا۔ اسلام آباد کی بار سمیت پورے ملک کی بار ایسوسی ایشنز اور وکلاء اس کا تحفظ کریں گے۔

پی ٹی آئی رہنما نے مطالبہ کیا کہ فوری طور پر نئے انتخابات کا اعلان کیا جائے۔