تحریک انصاف کا عید کے بعد ملک بھر میں جلسوں کا اعلان

پاکستان تحریک انصاف (پی ٹی آئی) کے رہنماؤں نے سابق وزیراعظم عمران خان سے اڈیالہ جیل میں ملاقات کی اور پی ٹی آئی رہنماؤں نے عید کے بعد جلسوں کا اعلان کردیا۔

اڈیالہ جیل راولپنڈی کے باہر میڈیا سے گفتگو کرتے ہوئے پی ٹی آئی رہنما عمرایوب نے کہا کہ آج ہماری بانی پی ٹی آئی سے ملاقات ہوئی، بانی پی ٹی آئی کا پیغام ہے چرائے ہوئے مینڈیٹ کے لیے جدوجہد جاری رکھنی ہے، عمران خان نے زور دیا ہم عدلیہ کے ساتھ کھڑے تھے اور رہیں گے۔

عمر ایوب نے کہا کہ بشریٰ بی بی کے کھانے میں زہر ملایا گیا تھا، بشریٰ بی بی کا چیک اپ ہونے جارہا ہے، بشریٰ بی بی بانی پی ٹی آئی کی کمزوری نہیں طاقت ہے۔عمران خان نے فوکل پرسنز کی کمیٹی تشکیل دے دی ہے جس میں انہوں نے مجھے بیرسٹر گوہر علی خان،شبلی فراز، بیرسٹر علی ظفر اور ایڈووکیٹ انتظار حسین پنجوتھہ کو شامل کیا ہے - عمران خان سے جو پارٹی رہنما ملاقاتوں کے لئیے آئیں گے یہ کمیٹی طے کرے گی.

انہوں نے مزید کہا کہ بشری بی بی کو عمران خان کی کمزوری ہرگز نہ سمجھا جائے وہ عمران خان کی طاقت ہے وہ عمران خان کے ساتھ پہلے بھی کھڑی تھی اب بھی کھڑی ہے اور آئیندہ بھی کھڑی رہیں گی - انکو وہ تمام تر سہولیات دی جانی چاہئے جو ہر شہری کا بنیادی قانونی حق ہے۔

رہنما پی ٹی آئی نے مزید کہا کہ بانی چیئرمین نے اپنے پیغام میں کہا ہے کہ ہمارے مینڈیٹ پر جو ڈاکہ ڈالا گیا ہے اس مینڈیٹ کی واپسی کے لئیے جدوجہد جاری رکھیں گے عمران خان نے یہ بھی کہا ہے کہ اسلام آباد ہائیکورٹ کے ججز کی جانب سے جو خط لکھا گیا ہے اس پر سپریم کورٹ آف پاکستان کو لارجر بنچ تشکیل دے کر تعین کرنا چاہئیے کہ کیوں اور کیسے خفیہ ادارے عدلیہ کے معاملات میں اثر انداز ہوتے ہے ہم اپنے بہادر ججز اور عدلیہ کے ساتھ کھڑے ہے۔

اس موقع پر سابق اسپیکر قومی اسمبلی اسد قیصر نے کہا کہ عید کے بعد بھرپور تحریک چلائیں گے، پورے پاکستان میں جلسوں کا شیڈول دیا جائے گا، ججز کو دھمکیاں ملنے پر تشویش ہے۔ 12 اپریل کو ملک بھر میں جلسوں کااعلان کریں گے، ان لوگوں نے پاکستان کو بنانا ری پبلک بنادیا ہے، ہمارا گرینڈالائنس بناہے،جلسے بھی ہوں گے۔

شبلی فراز کا کہنا تھا کہ ہم نے عدالتوں میں جدوجہد کرنا ہے، فارم 45 اور فارم 47 والے لوگوں میں فرق کرنا ہوگا، عوام نے تحریک انصاف کو بھرپور میںڈیٹ دیا جو چرالیا گیا، ملک کسی افراتفری کوبرداشت نہیں کرسکتا، پہلا جلسہ پشین میں ہوگا۔