اقوام متحدہ کا غزہ میں جنگی اور انسانیت کیخلاف جرائم پر اسرائیل کا محاسبہ کرنے پر زور

اقوام متحدہ کی انسانی حقوق کونسل نے ایک قرارداد منظور کی ہے جس میں غزہ میں جنگی اور انسانیت کیخلاف جرائم پراسرائیل کا احتساب کرنے پر زور دیا گیا ہے۔

قرارداد اسلامی تعاون تنظیم کی جانب سے پاکستان نے پیش کی ، 28 ممالک نے قرار داد کے حق اور امریکہ اور جرمنی سمیت چھ ممالک نے مخالفت میں ووٹ دئیے جبکہ 13ممالک نے رائے شماری میں حصہ نہیں لیا۔قرارداد میں عالمی قوانین اور انسانی حقوق کے عالمی قوانین کی ہر طرح کی خلاف ورزی پر احتساب یقینی بنانے کی ضرورت پر زور دیا گیا۔

اقوام متحدہ کی انسانی حقوق کونسل کی جانب سے منظور کی گئی قرارداد میں اسرائیل کو ہتھیاروں کی فروخت روکنے کا بھی مطالبہ کیا گیا۔تقریباً چھ ماہ سے جاری جنگ میں پہلی بار اقوام متحدہ کے انسانی حقوق کے بڑے ادارے نے اس پر اپنا موقف اختیار کرتے ہوئے قرارداد کی منظوری دی۔