معیشت کو مستحکم کرنے کیلئے ٹھوس اقدامات کر رہے ہیں ، وزیر اطلاعات

اسلام آباد : اطلاعات ونشریات کے وفاقی وزیر عطااللہ تارڑ نے کہا ہے کہ حکومت معیشت کو مستحکم کرنے کیلئے ٹھوس اقدامات کررہی ہے اور مختلف شعبوں میں اس کے مثبت نتائج سامنے آرہے ہیں۔آج (ہفتہ) لاہور میں صحافیوں سے گفتگو کرتے ہوئے انہوں نے ملک کو درپیش مسائل کے حل کے حکومتی عزم کا اعادہ کیا۔

انہوں نے کہا کہ پاکستان کی معیشت کے حوالے سے مثبت اشاروں کا بین الاقوامی ذرائع ابلاغ میں بھی اعتراف کیا جارہا ہے۔وزیراطلاعات نے کہا کہ بلوم برگ نے پاکستان میں مہنگائی میں کمی کی پیش گوئی کی ہے۔انہوں نے کہا کہ گیلپ سروے کے مطابق سرمایہ کاروں کے اعتماد میں اضافہ ہوا ہے جس سے مقامی سرمایہ کاری میں مثبت رجحان پایا جارہا ہے۔

انہوں نے کہا کہ ملک میں مہنگائی میں کمی اور شرح نمو میں اضافے کی توقع ہے۔عطااللہ تارڑ نے کہا کہ بین الاقوامی ادارے اور جریدے شہبازشریف کی حکومت سے متعلق مثبت خبریں دے رہے ہیں اور تاجروں کا اعتماد بھی بحال ہوچکا ہے۔انہوں نے کہا کہ کچھ عناصر پاکستان میں ترقی نہیں دیکھنا چاہتے اور یہی ریاست مخالف عناصر سی پیک منصوبے کو ناکام بنانے کی سازش کررہے ہیں۔