وزیر اعظم شہباز شریف اور امیر قطر کے درمیان ٹیلی فونک رابطہ

وزیر اعظم شہباز شریف کا قطر کے امیر شیخ تمیم بن حمد الثانی سے ٹیلی فونک رابطہ ہوا، جس میں انہوں نے امیر قطر کو عیدالفطر کی مبارکباد دی۔

منگل کو وزیر اعظم شہباز شریف اور قطر کے امیر شیخ تمیم بن حمد الثانی کے درمیان ٹیلیفونک رابط ہوا، جس میں وزیر اعظم نے قطر کے امیر کو عید الفطر کی مبارکباد پیش کی۔

ٹیلی فونک رابطے میں امت مسلمہ کے اتحاد اور پاکستان قطر کی خوشحالی کی دعا کی گئی جبکہ دونوں رہنماؤں نے پاکستان اور قطر کے درمیان قریبی برادرانہ تعلقات کا اعادہ کیا۔

وزیراعظم شہباز شریف نے پاکستان کی قطر کے ساتھ مشترکہ مفاد کے تمام شعبوں میں مل کر کام کرنے کا اعادہ کیا۔

اس کے علاوہ دنوں رہنماؤں نے اقتصادی اور تجارتی تعلقات کو مزید مستحکم کرنے کے عزم کا اعادہ بھی کیا ۔

امیر قطر نے بھی گرمجوشی سے وزیر اعظم کو عید کی مبارکباد پیش کی اور پاکستانی عوام کے لیے نیک خواہشات کا اظہار کیا۔

وزیراعظم شہباز شریف نے قطر کے امیر کو پاکستان کا سرکاری دورہ کرنے کی دعوت دی، شیخ تمیم بن حمد الثانی نے دعوت قبول کرتے ہوئے یقین دہانی کرائی کہ وہ جلد پاکستان کا دورہ کریں گے۔

گزشتہ سال دونوں ممالک کے درمیان سفارتی تعلقات کے قیام کی 50 ویں سالگرہ منائی گئی، دونوں رہنماؤں نے ایک دوسرے کے ساتھ مل کر کام کرنے اور تمام باہمی فائدہ مند شعبوں میں تعاون کو مزید وسعت دینے کے عزم کا اعادہ کیا۔