وفاقی کابینہ کی جانب سے ایران کے ساتھ مختلف ایم او یوز پر دستخط کی منظوری

وفاقی کابینہ نے ایران کے ساتھ مختلف شعبوں میں مفاہمت کی یادداشتوں (ایم او یوز) پر دستخط کرنے کی منظوری دی۔

میڈیا رپورٹس کے مطابق وفاقی کابینہ نے سرکولیشن سمری کے ذریعے ایران کے ساتھ مفاہمت کی یادداشتوں پر دستخط کی منظوری دے دی ہے۔

پاکستان اور ایران نے افرادی قوت اور فلم اور سینما میں تعاون کے لیے مفاہمت کی یادداشتوں پر دستخط کرنے کا فیصلہ کیا ہے، ایم او یوز کے تحت فلم کے لیے مشترکہ پروڈکشن کے منصوبے شروع کیے جائیں گے، ایک دوسرے کی فلم انڈسٹری کو سمجھنے کے لیے وفود کا تبادلہ کیا جائے گا۔

 پاکستان اور ایران افرادی قوت کے لیے ایم او یو پر دستخط کریں گے، دونوں ممالک کے درمیان ہنرمند افرادی قوت کے تبادلے کے لیے اقدامات کیے جائیں گے۔ایم او یوز کے تحت ورکرز کی فلاح و بہبود کے لیے مشترکہ تعاون کو فروغ دیا جائے گا، ورکرز ویلفیئر فنڈ کے قیام کا جائزہ لیا جائے گا۔

پاکستان اور ایران میں فلم ویکس اور دیگر ثقافتی تقریبات کا انعقاد کیا جائے گا۔