کل ضمنی الیکشن نہیں بلکہ ایک ڈھونگ رچایا گیا، عمر ایوب

اپوزیشن لیڈر عمر ایوب نے کہا ہے کہ ضمنی الیکشن نہیں بلکہ ایک ڈھونگ رچایا گیا۔

اسلام آباد میں بیرسٹر گوہر اور صاحبزادہ حامد رضا کے ہمراہ میڈیا سے گفتگو کرتے ہوئے عمر ایوب نے کہا کہ الیکشن کے روز انٹرنیٹ سروسز بند کر دی گئی۔ہمارے سامنے گجرات میں نیوز چینلز کے کیمرہ مین اور رپورٹر کو گھسیٹ کر جس طرح بے دردی سے پنجاب پولیس نے گرفتار کیا اور ان پر تشدد کیا۔

پوچھنے پر ہمیں بتایا گیا کہ پولیس کی وردی میں ایجنسیز کے لوگ پھر رہے ہیں گرفتاریاں وہ لوگ کررہے ہیں درندگی اور لاقانونیت کی ہر حد پار کرچکے ہے یہ لوگ کل مجھے اور بیرسٹر گوہر کو پولیس کی جانب سے متعدد بار گرفتار کرنے کی کوشش کی گئی اور پولنگ اسٹیشن کے اندر ہمیں نہیں داخل ہونے دیا گیا۔

عمر ایوب نے کہا کہ انشاء اللہ تعالیٰ تحریک تحفظ آئین پاکستان فیصل آباد سے جلسوں کا آغاز کرے گی اس کے بعد پانچ مئی کو ہمارا جلسہ کراچی میں ہوگا،پنجاب، اندرون سندھ اور خیبرپختونخوا میں بھی جلسے ہونگے اس جمعہ کو پورے پاکستان میں صوبائی اسمبلی کی سیٹوں پر ہمارے امیدوار ہمارے منتخب نمائندوں کا ایک بھرپور احتجاجی مظاہرہ کیا جائے گا۔

اس موقع پر گفتگو کرتے ہوئے بیرسٹر گوہر نے کہا کہ ضمنی انتخابات میں گجرات پولنگ اسٹیشن میں ہمیں روکا گیا، 700 ووٹ والے پولنگ اسٹیشن میں 900 سے زائد ووٹ ڈالے گئے، الیکشن کمیشن حکام نے خود بتایا کہ دھاندلی جاری ہے۔

چیئرمین پی ٹی آئی نے مزید کہا کہ الیکشن کمیشن سے مطالبہ ہے پنجاب میں جیت کے نوٹیفکیشن روکے جائیں، الیکشن کمیشن اورسپریم کورٹ سے استدعا ہے کہ آر او جوڈیشری سے لیں، الیکشن کمیشن نے عدلیہ سے آر او کیوں نہیں لیے۔ ہر بار ملک میں ووٹ اور جمہوریت کے ساتھ کھیلا جاتا ہے، حقیقی عوامی منتخب نمائندے ہوں گے تو ملک میں بہتری آئے گی۔

تحریک انصاف کے رہنما کا یہ بھی کہنا ہے کہ بانیٔ پی ٹی آئی کی رہائی اور مہنگائی کم ہونے پر بات کرنا چاہتے ہیں۔

سنی اتحاد کونسل کے سربراہ حامد رضا نے کہا کہ ہم آئین و قانون کے اندر رہ کر پنجاب سے تحریک کا آغاز کرنے جارہے ہیں،تحریک کے ذریعے کچے اور پکے کے ڈاکوؤں کا احتساب کریں گے-

انہوں نے کہا کہ کل والے الیکشن کو الیکشن کہنا بھی الیکشن کی توہین ہے جس طرح کل آر اوز سے زبردستی نتائج لیے گئے، پریزائیڈنگ افسران سے زبردستی فارم 45 پر دستخط لیے ان پر تشدد کیا گیا، گورنر ہاؤس میں لوگوں کو پیسے دینے کی ویڈیو بنائی گئی اس کی صرف مذمت کافی نہیں۔

الیکشن کمیشن ، حکومت پنجاب ان کے اوپر غداری آرٹیکل 6 کی ایف آئی آرز ہونے چاہیے اس طرح آئین پاکستان کا کھلم کھلا مزاق تاریخ میں نہیں اڑایا گیا ہم ان الیکشن کو ہم ان نتائج کو مکمل طور پر مسترد کرتے ہیں