رات کے اندھیرے میں پی ٹی آئی کے دفتر کو گرایا گیا، شبلی فراز

پاکستان تحریک انصاف کےسینیٹرشبلی فراز نے کہا کہ پی ٹی آئی کےمرکزی دفتر کو رات کے اندھیرے میں گرایا گیاہے۔

سینیٹ میں اظہار خیال کرتے ہوئے انہوں نے کہا کہ انتخابات میں پی ٹی آئی سے نشان لے سکتے ہیں، گرفتاریاں کر سکتے ہیں لیکن پی ٹی آئی رہنمائوں کے دلوں سے بانی پی ٹی آئی عمران خان کو نہیں نکال سکتے۔

انہوں نے کہا کہ اسلام آباد کے صدر عامرمغل کو بھی گرفتار کیا گیا، ہم نہ صرف اس واقعے کی مذمت کرتے ہیں بلکہ مطالبہ کرتے ہیں کہ ہمارے ساتھیوں کو فوری رہا کیا جائے۔

شبلی فراز نے کہا کہ ملک میں فسطائیت کی ایک لہر آئی ہوئی ہے، سیاسی کیسز کی بنیاد پر ہماری لیڈرشپ کو گرفتار کیا گیا اور کل ایک شرمناک واقعہ پیش آیا ہے۔

سینیٹر کا کہنا تھا کہ حکمران جتنے ظلم وستم کرلیں یہ سب لکھا جائے گا اور جو آج اطمینان سے بیٹھے ہوئے ہیں، انہیں بتانا چاہوں گا کہ یہ صرف ہمارے ساتھ نہیں ہورہا۔

یہ لوگ سیاسی طور پر تحریک انصاف کا مقابلہ نہیں کرسکتے تو اب اوچھے ہتھکنڈوں پر اتر آئے ہیں، ایسی حرکتوں سے جمہوریت نہیں چلے گی، اگر یہ اس کو سیاست کہتے ہیں تو ہم ایسی سیاست چھوڑنے کو تیار ہیں۔