وزیراعظم کی زیر صدارت خصوصی سرمایہ کاری کونسل کا اجلاس آج ہوگا

خصوصی سرمایہ کاری کونسل (ایس آئی ایف سی) کا دسواں اجلاس آج ہو گا، جس کی صدارت وزیراعظم شہباز شریف کریں گے۔

تفصیلات کے مطابق خصوصی سرمایہ کاری کونسل کا اجلاس دوپہر ایک بجے وزیراعظم ہاؤس میں ہوگا اور اس حوالے سے ایجنڈا جاری کردیا گیا ہے۔اجلاس میں غیر ملکی سرمایہ کاری پر تبادلہ خیال کیا جائے گا۔

ایس آئی ایف سی اجلاس میں پنجاب کے وزرائے اعلیٰ مریم نواز، سندھ سید مراد علی شاہ، بلوچستان سرفراز بگٹی اور خیبر پختونخوا کے علی امین گنڈا پور کو مدعو کیا گیا ہے۔

اجلاس میں وفاقی وزیر اطلاعات عطا اللہ تارڑ، وزیر خزانہ محمد اورنگزیب، وزیر دفاع خواجہ آصف، وزیر منصوبہ بندی و ترقی احسن اقبال، وزارت تجارت جام کمال خان، وزیر قانون و انصاف نذیر تارڑ اور وزیر آبی وسائل کو بھی مدعو کیا گیا ہے۔

نائب وزیراعظم و وزیر خارجہ اسحاق ڈار بھی ایس آئی ایف سی اجلاس میں شرکت کریں گے جب کہ چاروں چیف سیکرٹریز کو بھی اجلاس میں مدعو کیا گیا ہے۔