شوگرسکینڈل تحقیقات: حکومت کا جہانگیر ترین کے خلاف کیس نیب کو دینے پر غور، ذرائع

ذرائع کے مطابق  وفاقی حکومت  کی جانب سے  ایف آئی اے کی تفتیش پر عدم اطمینان کا اظہار کیا گیا ہے جس کے بعد  جہانگیر ترین کے خلاف کیس نیب کو دینے پر غور کیا جارہا ہے ۔ ذرائع کاکہنا ہے کہ  شہزاد اکبر بھی ایف آئی اے کی اب تک کی تفتیش سے مطمئن نہیں، ایف آئی اے لاہور آفس کے دورہ میں شہزاد اکبر کو ترین کے خلاف کیس پر تفصیلی رپورٹ دی گئی تھی۔ علی ظفر کی ابتدائی رپورٹ میں بھی ایف آئی اے کی تفتیش میں جہانگیر ترین کے خلاف ٹھوس شواہد نہ ہونے کی بات کی گئی ہے۔جبکہ  ایف آئی اے ابھی تک جہانگیر ترین کے خلاف چالان بھی عدالت میں پیش نہیں کرسکا۔  ذرائع کے مطابق   نیب آرڈیننس کے تحت نیب کسی بھی ادارہ سے کیس خود تحقیقات کےلیے لے سکتا ہے۔اس حوالے سے بجٹ منظوری کے بعد  اہم فیصلہ متوقع ہے ۔

واضح رہے کہ31مارچ کو  ایف آئی اے  کی جانب سے تحریک انصاف کے رہنما  جہانگیر ترین اوران کے بیٹے  علی ترین   پر  منی لانڈرنگ اور فراڈ کے مقدمات درج کیے گئے تھے ۔ ایف آئی اے نے  سوا تین ارب روپے کے مالیاتی فراڈ  اور منی لانڈرنگ پر جہانگیر ترین اور فیملی کے دیگر افراد پر مقدمہ درج کیا۔ دائر ایف آئی آر میں چینی کی ذخیرہ اندوزی ،خوردبرداوردھوکادہی کاالزام لگایا گیاہے ۔ مقدمہ میں سابق سیکرٹری ایگری کلچر رانا نسیم کو  بھی شامل  کیا گیا ۔ایف آئی اے کے مطابق  رانا نسیم ہی اصل میں شوگر مل مافیا کی سرپرستی کرتے رہے ہیں۔  جہانگیر ترین نے اپنے داماد کی کاغذ بنانے والی بند فیکٹری میں جے ڈی ڈبلیو کمپنی سے سوا تین ارب منتقل کیے۔ بند فیکٹری میں منتقل ہونے والی رقم بعد ازاں فیملی ممبران کے اکاؤنٹس میں منتقل ہوئی۔ جہانگیر ترین کی فیکٹری میں 26 فیصد پبلک شئیر ہولڈرز ہیں۔  دوسرے مقدمہ میں جہانگیر ترین ، انکے بیٹے علی ترین اور دو بیٹیوں کے نام بھی شامل ہیں ۔ اس سے قبل جہانگیر ترین کے خلاف درج کیے گئے مقدمے میں ایف آئی اے نے 7 اعشاریہ 4 ملین ڈالرز کی منی لانڈرنگ کر کے رقم برطانیہ منتقل کرنے اور وہاں جائیدادیں خرید نے کا الزام عائد کیا تھا۔

دوسری جانب  پاکستان تحریک انصاف کے رہنما جہانگیر ترین نے وفاقی تحقیقاتی ادارے (ایف آئی اے) کے الزامات کو بےبنیاد اور من گھڑت  قرار دے دیا ۔پی ٹی آئی رہنما جہانگیر ترین  نے مبینہ فراڈ اور منی لانڈرنگ مقدمات   پر ردعمل دیتے ہوئے   کہا ہے کہ میرے اور میرے بچوں پر غلط ایف آئی آرز درج کی گئیں،  تمام شیئرز قانونی، کھاتے قانون کے مطابق منتقل کیے گئےاور  بیرون ملک منتقل کی گئی رقم پر ٹیکس ادا کیا گیا  ہے ۔