اسلاموفوبیا: کینیڈا میں پاکستانی خاندان کے قتل پر وزیراعظم کا اظہار افسوس

تفصیلات کے مطابق سماجی  رابطے کی ویب سائٹ ٹوئٹر پر پیغام میں  وزیراعظم عمران خان نے  کہا کہ اونٹاریو کے علاقے لنڈن میں ایک پاکستانی نژاد مسلمان کینیڈین خاندان کے قتل پر بے حد افسردہ ہوں۔ انہوں نے  کہا کہ دہشت گردی کا یہ قابل مذمت اقدام مغربی ممالک میں بڑھتے ہوئے اسلاموفوبیا کی علامت ہے،  جس کے (اسلاموفوبیا) تدارک کے لئے عالمی برادری کی جانب سے اقدامات وقت کی اہم ضرورت ہیں۔

اونٹاریو کے علاقے لنڈن میں ایک پاکستانی نژاد مسلمان کینیڈین خاندان کے قتل پر بے حد افسردہ ہوں۔ دہشت گردی کا یہ قابل مذمت اقدام مغربی ممالک میں بڑھتے ہوئے اسلاموفوبیا کی علامت ہے جس کے (اسلاموفوبیا) تدارک کے لئے عالمی برادری کی جانب سے کلی طور پر اقدامات وقت کی اہم ضرورت ہیں۔

— Imran Khan (@ImranKhanPTI) June 8, 2021

وزیرخارجہ شاہ محمود قریشی نے کینیڈا میں پاکستانی نژاد خاندان کے ساتھ پیش آنے والے المناک واقعہ کو دہشتگردی قرار دے دیا ۔ انہوں نے کہا کہ مغرب میں اسلاموفوبیا میں اضافہ ہورہا ہے، جس کے آگے بند باندھنا ہوگا، اسلامو فوبیا ایک ٹرینڈ ہے، جس کی پاکستان نشاندہی کررہا ہے۔ وزیرخارجہ نے کہا کہ مجھےوزیراعظم کینیڈا سے امید ہے کہ وہ اپنا کردار ادا کریں گے، یہ ابھرتا ہوا ٹرینڈ نظر آرہا ہے، یہ واقعہ کینیڈا تک محدود نہیں ہے، یہ ایک ٹرینڈ ہے اسلامو فوبیا،جس کی پاکستان نشاندہی کررہا ہے۔ وزیر خارجہ نے کہا کہ او آئی سی میں اسلاموفوبیا پر ایک قرارداد پیش کی تھی جو متفقہ طور پر منظور ہوئی تھی، مغرب میں اسلاموفوبیا میں اضافہ ہورہا ہے، جس کا تدارک ضروری ہے، اسلاموفوبیا کا تدارک نہیں کیا گیا تو معاشرے بٹ جائیں گے، انتقامی کارروائی شروع ہوجائے گی۔

واضح رہے کہ کینیڈا میں  20سالہ کار سوار شخص نے مسلمان خاندان پر گاڑی چڑھا دی جس کے نتیجے میں 4افراد جاں بحق ہوگئے۔ کنیڈین صوبے اونٹاریو کے شہر لندن میں یہ خوفناک سانحہ پیش آیا، جہاں ایک ہی خاندان کے 4 افراد جان سے ہاتھ دھو بیٹھے ۔ اس حوالے سے کینیڈین پولیس کا کہنا ہے کہ ایک مسلمان خاندان  کو مذہبی تعصب کانشانہ بنایا گیا ، اس بات کےثبوت موجودہیں کہ یہ سب باقاعدہ منصوبہ بندی سےکیاگیا،ملزم پرقتل کامقدمہ چلایاجائےگا،

دوسری جانب کینیڈین وزیراعظم جسٹن ٹروڈو کا کہنا ہے کہ اونٹاریو واقعے نے انہیں ہلا کر رکھ دیا ہے، کینیڈا میں اسلاموفوبیا کے لیے کوئی جگہ نہیں، اس نفرت کو ختم کرنا ہوگا۔