پنجاب اسمبلی کے سامنے اساتذہ و ملازمین کا شدید احتجاج

لاہور : پنجاب اسمبلی لاہور کے سامنے آل گورنمنٹ ایمپلائز گرینڈ الائنس پاکستان کے مرکزی صدرکی  قیادت میں سینکڑوں اساتذہ و ملازمین نے تعلیمی اداروں کی پیف و این جی اوز کو حوالگی کے خلاف ، تنخواہوں والاونسز میں 100 فیصد اضافہ ، زیر التواء نیشنل ہیلتھ ملازمین کی آپ گریڈیشن اور حسب وعدہ لیو انکیشمنٹ نوٹیفکیشن کو ڈی نوٹیفائی نہ کرنے پر پر امن احتجاج کیا ۔

اساتذہ اپنے مطالبات کے حق میں شدید نعرہ بازی کرتے رہے اور سیکرٹری سکول پنجاب دفتر 11 - لارنس روڈ تک احتجاجی ریلی نکالی اور ایک گھنٹہ تک احتجاج کرتے رہے اس موقع پر مقررین کا کہنا تھا کہ حکومت اساتذہ بھرتی کرنے کے بجائے تعلیمی اداروں کو ٹھیکے پر دینے کے لیے تلی ہوئی ہے ٹھیکیداری نظام سے نظام تعلیم تباہ و برباد ہو جائے گا پیف اور پیما دونوں ناکام ہو چکے ہیں۔

اساتذہ نے مہنگائی پر بات کرتے ہوئے کہا کہ مہنگائی آسمان کو چھو رہی ہے جبکہ مہنگائی میں کمی کے دعوے کئے جا رہے ہیں لہذا تنخواہوں میں 100 فیصد اضافہ کیا جائے ، لیو انکیشمنٹ کا نوٹیفکیشن حسب وعدہ ڈی نوٹیفائی کیا جائے اور نیشنل ہیلتھ ملازمین کی زیر التواء آپ گریڈیشن فی الفور نمٹایا جائے۔

اساتذہ نے احتجاج کی کال دیتے ہوئے کہا کہ حکومت نے تعلیمی اداروں کی پیف کو حوالگی کا عمل نہ روکا تو پنجاب بھرمیں احتجاج کیا جائے گا دفاتر ، سکولوں اور کالجوں کی تالہ بندی کریں گے۔7 جون کو وفاقی بجٹ کے موقع پر پارلیمنٹ ہاؤس اسلام آباد کے سامنے آل گورنمنٹ ایمپلائز گرینڈ الائنس پاکستان کے زیر انتظام احتجاج کیا جائے گا۔