نیب ترامیم کیس، سپریم کورٹ کا سماعت براہ راست نشر نہ کرنے کا فیصلہ

سپریم کورٹ نے نیب ترامیم کالعدم قرار دینے کے خلاف انٹرا کورٹ اپیلوں پر سماعت براہ راست نشر نہ کرنے کا فیصلہ کیا ہے۔ 

نیب ترامیم کالعدم قرار دینے کےخلاف انٹرا کورٹ اپیلوں پر سماعت جاری ہے۔

سابق وزیر اعظم عمران خان بذریعہ ویڈیو لنک عدالت میں پیش ہو گئے جب کہ سماعت کو براہ راست دکھانے کی درخواست مسترد کردی گئی۔

سماعت کے آغاز پر براہ راست نشر کرنے کے حوالے سے 5 رکنی بینچ نے مشاورت کی، جس میں 4 ججوں نے براہ راست نشریات نہ کرنے کے حق میں کہا۔

جسٹس اطہر من اللہ نے براہ راست نشریات کی حمایت کردی تھی، انہوں نے کہا کہ مقدمہ پہلے لائیو دیکھایا جاتا تھا تو اب بھی لائیو ہونا چاہیے۔

5 رکنی بینچ میں جسٹس امین الدین خان اور جسٹس جمال خان مندوخیل ،جسٹس اطہرمن اللہ اور جسٹس حسن اظہر رضوی لارجر بینچ میں شامل ہیں۔

واضح رہے کہ گزشتہ سماعت پربھی سابق چیئرمین پی ٹی آئی ویڈیو لنک پر پیش ہوئے تھے۔ سپریم کورٹ نے بانی پی ٹی آئی کو ویڈیو لنک کے ذریعے پیش کرنے کی ہدایت کر رکھی ہے۔

یاد رہے کہ گزشتہ سال سابق چیف جسٹس عمر عطا بندیال کی سربراہی میں سپریم کورٹ کے 4 رکنی بینچ نے نیب ترامیم کو بانی پی ٹی آئی کی درخواست پر کالعدم قرار دے کر سیاست دانوں کے 50 کروڑ سے کم مالیت کے کرپشن کیسز نیب کو منتقل کر دیئے تھے۔