دو جون سے کراچی سمیت سندھ کے مختلف اضلاع میں گرمی کی شدت میں کمی کا امکان

دو جون سے کراچی سمیت سندھ کے مختلف اضلاع میں گرمی کی شدت میں کمی کا امکان ہے۔

محکمہ موسمیات کے مطابق دیہی سندھ کے مختلف اضلاع میں آج (جمعے) سے 4 جون تک گرمی کی شدت میں کمی کا امکان ہے۔ کراچی میں گرمی کی لہر کل تک برقرار رہ سکتی ہے۔

کراچی میں 2 جون سے گرمی کی شدت بتدریج کم ہونا شروع ہوجائے گی۔ سندھ کے دیگر شہروں دادو، قمبر ، شہداد کوٹ ، لاڑکانہ ، جیکب آباد، شکارپور، کشمور گھوٹکی میں پارہ 46 تا 48  ہوسکتا ہے۔

محکمہ موسمیات کے مطابق سانگھڑ ، حیدرآباد، مٹیاری ، ٹنڈو الہیار، ٹنڈو محمد خان ، میر پور خاص اور عمر کوٹ میں درجہ حرارت 42 تا 44 ڈگری رہنے کا امکان ہے۔ ٹھٹہ ، سجاول ، بدین اور تھر پارکر میں 38 تا 40 ڈگری ہوسکتا ہے۔

محکمہ موسمیات کے مطابق 2 جون سے شہر میں سمندری ہوائیں چلنے کا امکان ہے جب کہ بادلوں کی آمد بھی متوقع ہے جس کے سبب درجہ حرارت میں کمی ہوسکتی ہے اور 10 جون تک کراچی کا موسم بہتر رہے گا۔

دوسری جانب پنجاب کے مختلف شہروں اور میدانی علاقوں میں موسم کی سختی کے حوالے سے بات کرتے ہوئے سردار سرفراز نے کہا کہ پنجاب ابھی گرمی کی لپیٹ میں رہے گا لیکن گرمی کی شدت میں معمولی کمی آنے کا امکان ہے۔

ملک میں آج ایک مغربی سسٹم داخل ہورہا ہے، مغربی ہواؤں کا یہ سسٹم خشک ہواؤں پر مشتمل ہے جس کے تحت شمالی علاقہ جات، کے پی، مالا کنڈ، چترال اور دیر سمیت گلگت بلتستان جیسے دیگر علاقوں میں بارش کا امکان ہے۔

چیف میٹرولوجسٹ سردار سرفراز کا کہنا تھا کہ مغربی سسٹم کے تحت سندھ میں درجہ حرارت 2 سے 3 ڈگری تک گرنے کا امکان ہے، سندھ میں جہاں درجہ حرارت 50 اور 52 تک ریکارڈ کیا جارہا ہے وہ اب 46 یا 47 تک ریکارڈ کیا جاسکے گا، اسی طرح پنجاب میں بھی گرمی کی شدت 2 سے 3 ڈگری تک کم ہوسکتی ہے۔

چیف میٹرولوجسٹ نے کہا کہ لاہور، جہلم، سیالکوٹ اور اسلام آباد سمیت گردونواح میں 5 جون سے 7 جون تک کہیں آندھی تو کہیں ہلکی اور درمیانے درجے کی بارش کا امکان ہے جسے پری مون سون کا سلسلہ کہا جاسکتا ہے۔