کراچی کے مختلف علاقوں میں بارش ، سمندری طوفان کا پانچواں الرٹ جاری

کراچی: شہر میں صبح سے تیز ہواؤں کے ساتھ بارش کا سلسلہ جاری ہے۔ آئی آئی چندریگر روڈ، صدر، برنس روڈ، ڈیفنس ویو، محمودآباد اور اختر کالونی سمیت مختلف علاقوں میں بارش ہو رہی ہے۔ 

کراچی میں 31 اگست تک وقفے وقفے سے بارش کا امکان ہے، سندھ کے ساحلی علاقوں کے علاوہ بدین، ٹھٹہ، سجاول، حیدرآباد، ٹنڈو محمد خان اور دیگر اضلاع میں بھی تیز ہواؤں اور بارش کا امکان ہے۔ 

دوسری جانب محکمہ موسمیات نے گزشتہ روز بحیرہ عرب میں سمندری طوفان کی پیش گوئی کی تھی، جس کے اثرات اب سندھ میں محسوس کیے جا رہے ہیں۔ محکمہ موسمیات کے مطابق سمندری طوفان گوادر کے مشرق اور جنوب مشرق کے سمندر تک پہنچ سکتا ہے۔ 

 محکمہ موسمیات نے شمال مشرقی بحیرہ عرب میں بننے والے سمندری طوفان اسنیٰ کے حوالے سے پانچواں الرٹ جاری کردیا۔محکمہ موسمیات کی جانب سے جاری الرٹ میں بتایا گیا ہے کہ سندھ کے ساحل سے شمال مشرقی بحیرہ عرب پر آنے والا سمندری طوفان اسنیٰ گزشتہ 6 گھنٹوں کے دوران مغرب کی طرف بڑھ، جس کے بعد اس کا کراچی سے فاصلہ تقریبا 120 کلومیٹر جبکہ ٹھٹھہ سے 180 کلومیٹر رہ گیا ہے۔

محکمہ موسمیات کے مطابق بلوچستان کے ساحلی مقام اوڑماڑہ سے طوفان کا فاصلہ 250 کلومیٹر جبکہ گوادر سے 440 کلومیٹر ہے۔ سمندری غیرمعمولی سرگرمی ابتداء میں مغرب/ شمال مغرب اور پھر مغرب/جنوب مغرب کی جانب بڑھنے کا امکان ہے۔

محکمہ موسمیات نے خبردار کیا ہے کہ طوفان کے دوران سمندر میں شدید طغیانی کا خطرہ ہے۔ اس صورتحال کے پیش نظر ماہی گیروں کو 31 اگست تک گہرے سمندر میں جانے سے روک دیا گیا ہے جبکہ بلوچستان کے ماہی گیروں کو یکم ستمبر تک گہرے سمندر میں نہ جانے کی ہدایت کی گئی ہے۔