گھوٹکی ٹرین حادثے کی ابتدائی تحقیقاتی رپورٹ مکمل

تفصیلات کے مطابق   محکمہ ریلوے کے سینئر ماتحت عملے نے رتی ریلوے اسٹیشن پر دو ٹرینوں کے حادثے کی ابتدائی تحقیقاتی رپورٹ مکمل کرلی ہے۔

 ریلوے ذرائع کے مطابق پرماننٹ ورکس انسپکٹر، ایڈ ٹی ایکس آر و دیگر عملے نے اپنی رپورٹ مرتب کر لی ہے۔  رپورٹ کے مطابق حادثہ ٹریک کے جوڑ کی ویلڈنگ ٹوٹنے کی وجہ سے پیش آیا ہے۔

رپورٹ کے مطابق  ٹوٹی ہوئی لائن کی جگہ سے تین  انچ کا فرق واضع نظر آیا، ریلوے لائن کی ویلڈنگ والی جگہ سے ملت ایکسپریس کے انجن اور 6 بوگیاں گذرنے کے بعد دوبوگیاں 2-4235 اور 2-11234 ٹریک سے اتر گئیں،تین بوگیاں 11575، 12834 اور 12336 ٹریک پر ہہ رک گئیں۔

رپورٹ میں کہا گیا ہے کہ  سر سید ایکسپریس کم فاصلے پر تھی اور اچانک آکر ملت ایکسپریس کی بوگیوں سے ٹکرا گئی،حتمی فیصلے اور باقاعدہ انکوائری کےلئے رپورٹ ریلوے فیڈرل گورنمنٹ انسپکٹر کو ارسال کردی گئی ہے ۔  گریڈ 21 کے فیڈرل گورنمنٹ انسپکٹر دونوں ماتحت سینئر عملے کی رپورٹ کا بغور جائزہ لیں گے۔فیڈرل گورنمنٹ انسپکٹر اپنی الگ انسپکشن رپورٹ مکمل کریں گے۔

خیال رہے کہ  سندھ کے ضلع گھوٹکی کے علاقہ ڈہرکی کے قریب سرسید ایکسپریس اور ملت ایکسپریس میں تصادم کے نتیجے میں جاں بحق افراد کی تعداد 62ہوگئی۔ 47 میتیں ورثا کے حوالے کر دی گئیں۔

قبل ازیں ترجمان ریلوے کا کہنا تھا کہ  ریسکیو آپریشن کا کام مکمل کر لیا گیا ہے اور اب ٹریک کو فٹ کیا جارہا ہے  ۔ جیسے ہی ٹریک کا کام مکمل ہو جائے گا تو ٹرینوں کی روانگی شروع ہو جائے گی  ۔پاکستان ریلوے اپنے مسافروں سے معذرت خواہ ہے کہ انہیں حادثے کے باعث پریشانی اٹھانا پڑی۔ وزیر ریلوے محمد اعظم خان سواتی،  چیئرمین ریلوے حبیب الرحمن گیلانی اور سی ای او ریلوے نثار احمد میمن ساری رات رییلیف آپریشن کی نگرانی کر تے رہے ، ریلوے انتظامیہ اور تمام افسران بھی اس ریلیف آپریشن کی تکمیل تک ڈیوٹی پر موجود رہے۔جاں بحق اور زخمی ہونے والے افراد کی حتمی تعداد اکٹھی کر کے جاری کی جائےگی۔