ٹی 20 ورلڈ کپ جیت کر قوم کو خوشیاں دینا چاہتا ہوں، بابر اعظم

پاکستان کرکٹ ٹیم کے کپتان بابر اعظم کا کہنا ہے کہ ٹی 20 ورلڈ کپ جیت کر قوم کو خوشیاں دینا چاہتا ہوں، ورلڈ کپ جیتنا ہے تو ایک ہو کر کھیلنا ہوگا اور ہر ٹیم کو ہرانا ہو گا۔ ٹی ٹوئنٹی ورلڈ کپ کا سیمی فائنل اور فائنل کھیل چکے ہیں، اب وہ ٹرافی جیتنا چاہتے ہیں۔

پی سی بی پوڈ کاسٹ کے خصوصی انٹرویو میں گفتگو کرتے ہوئے بابر اعظم نے کہا کہ امریکا میں کھیلنا ایک مختلف تجربہ اور ایک چیلنج ہو گا، صرف بھارت کا میچ نہیں ،بلکہ تمام میچز ہمارے لیے اہمیت رکھتے ہیں۔

انہوں نے کہا کہ افسوس ہے کہ پچھلے 2 ٹی 20 ورلڈ کپ میں بہت قریب آ کر نہ جیت پائے، بحیثیت کپتان آئی سی سی ایونٹ نہ جیتنے کا افسوس ہے ، اس بار ٹرافی کو جیتنا ہمارا مقصد ہے.

قومی کرکٹ ٹیم کے کپتان نے مزید کہا کہ اپنے ذاتی ریکارڈ کے لیے نہیں کھیلتا ، فینز پاکستان ٹیم کو سپورٹ کریں یہ ہم سب کی ٹیم ہے۔

بابر اعظم نے کہا کہ اپنے اسٹرائیک ریٹ کو بہتر کرنے پر کافی کام کیا ہے، میچ کی صورتحال کے حساب سے بیٹنگ کرتا ہوں، میرا بیٹنگ اسٹائل ایسا نہیں کہ جاتے ہی چھکے مارنا شروع کر دوں۔