شیخ رشید کا ایک بار پھر گرفتار سیاسی کارکنوں کیلئے عام معافی کا مطالبہ

سابق وزیرداخلہ اور سربراہ عوامی مسلم لیگ شیخ رشید نے ایک بار پھر گرفتار سیاسی کارکنوں کیلئے عام معافی کا مطالبہ کر دیا، لوگ ان کیسز کی شکل میں مرگئے ہیں، سب بے گناہوں کو عام معافی ملنی چاہیے۔

شیخ رشید نے ڈسٹرکٹ کورٹ کے باہر  میڈیا سے  گفتگو کرتے ہوئے کہا کہ عالیہ حمزہ اور صنم جاوید کو روز جیلیں پھیرائی جا رہی ہیں، بے گناہ لوگوں کو عام معافی دیں۔معیشت کی تباہی اور فارم  45اور 47کی لڑائی گڑھے میں لے کر جائے گی، نہ یو اے ای سے نہ سعودی عرب سے اور نہ ہی چین سے پیسے ملے ہیں، ہمارے بہت سے قابل احترام دوست گئے تھے۔ ایک جمعہ بازار لگا ہے اور اس میں کوئی انہیں خیرات بھی نہیں دے رہا۔

انہوں نے کہا کہ جناب عاصم منیر اور ڈی جی آئی ایس آئی سے اپیل کرتا ہوں ،بے گناہ لوگوں کو عام معافی دیں، یہ کہنے کو کیس ہوتا ہے، جب آدمی صبح کورٹ آکر شام کو گھر جاتا ہے تو لگ پتہ جاتا ہے، موجودہ حکومت کی حیثیت گنگو تیلی سے زیادہ نہیں ہے۔

شیخ رشید نے مزید کہا  کہ ساری آئی ایل ایف کو سلام پیش کرتا ہوں، باقی لوگ کمپنی کی مشہوری کررہے ہیں، منی لانڈرنگ کے پیسوں سے پی ٹی آئی کی حکومت کے خلاف عدم اعتماد ہوا، بینظیر شہید بہتر تھی جس نے پہلے مہینے ہی ہمیں 7 سال قید دے دی تھی، یحییٰ خان کا کورٹ مارشل اچھا تھا، جس نے ایک سال قید اور 20 کوڑے لگا دیے تھے، پی ٹی آئی کے ورکرز کے پاس دو ہزار روپے دینے کو نہیں ہیں۔

پاک بھارت میچ کے حوالے سے بات کرتے ہوئے ان کاکہنا تھا کہ آج افسوس کا دن ہے ،ہم نے ہارنا ہی تھا، یہ خواجہ سراؤں کے ساتھ کرکٹ کھیلتے تو وہاں بھی ہارتے ، پاکستان میں لوگوں کے جذبات مجروح ہوتے ہیں۔