ہزاروں فلسطینیوں کے قاتل اسرائیل کا محاسبہ کیا جائے ، دفتر خارجہ

پاکستان نے کہا ہے کہ وقت آگیا ہے کہ سنگین جرائم پر اسرائیل کا محاسبہ کیا جائے اور عالمی ضمیر پر زور دیا ہے کہ غزہ میں فوری اور غیر مشروط جنگ بندی کے لئے اسرائیل پر دباؤ بڑھایا جائے۔

دفتر خارجہ کی ترجمان ممتاز زہرہ بلوچ نے آج اسلام آباد میں میڈیا کو اپنی ہفتہ وار بریفنگ میں کہا کہ فلسطینی عوام پر مسلط کردہ جنگ کا خاتمہ بھی انتہائی ضروری ہے۔

انہوں نے مزید کہا کہ فلسطینیوں کی بیت المقدس کیلئے قربانیاں کسی سے بھی ڈھکی چھپی نہیں ہیں ۔ 

انہوں نے کہا کہ پاکستان مشرقی بیت المقدس اور اسرائیل سمیت مقبوضہ فلسطینی علاقے پر اقوام متحدہ کے خود مختار عالمی کمیشن برائے تحقیقات کی رپورٹ کا خیرمقدم کرتا ہے۔

بھارت کے غیر قانونی زیرقبضہ جموں و کشمیر کی صورتحال کے حوالے سے ممتاز زہرہ بلوچ نے کہاکہ پاکستان کو1991 میں سرینگر میں چھوٹا بازار کے قتل عام کے متاثرین یاد ہیں۔