پی آئی اے کا کورونا ویکسین لگوانے والوں کو کرائے میں رعایت دینے کا اعلان

تفصیلات کے مطابق قومی ایئرلائن کے ترجمان نے بتایا ہے کہ 50 برس یا اس سے زائد عمر کے افراد کو کورونا ویکسین سرٹیفکیٹ دکھانے پر کرائے میں 10 فیصد رعایت دی جائے گی۔

پی آئی اے کے مطابق 50 برس یا اس سے زائد عمر کے افراد کے لیے رعایتی ٹکٹوں کا اعلان کورونا ویکسینیشن کے فروغ کےلیے کیا گیا ہے۔

قومی ایئرلائن کے حکام کا کہنا تھا کہ کرائے کی مد میں 10 فیصد رعایت اندرون ملک پروازوں پر دی جائے گی۔

ترجمان کے مطابق مذکورہ سہولت صرف کورونا ویکسین کا سرٹیفکیٹ دکھانے والوں کو حاصل ہوگی اور ٹکٹوں میں رعایت کا فیصلہ آج (10 جون) سے نافذ العمل ہوگیا ہے۔

خیال رہے کہ ان دنوں پاکستان میں 18 برس سے زائد عمر کے تمام افراد کو کورونا ویکسین لگانے کا عمل جاری ہے اور گزشتہ روز وفاقی وزیر اسد عمر نے ملک میں ایک کروڑ ویکسینز لگانے کا اعلان کیا تھا۔

علاوہ ازیں نیشنل کمانڈ اینڈ آپریشن سینٹر (این سی او سی) کے اجلاس میں فیصلہ کیا گیا تھا کہ وسیع پیمانے پر ملک بھر میں 3 مراحل میں ویکسینیشن مہم چلائی جائے گی جس میں تمام شہری رضاکارانہ طور پر ویکسینیشن کرائیں گے۔

تمام سرکاری اور نجی اداروں کے ملازمین کے لیے ویکسینیشن کو لازمی قرار دینے کا فیصلہ بھی کیا گیا تھا اور اس سلسلے میں تمام سرکاری ملازمین کی 30 جون تک ویکسینیشن کر لی جائے گی۔

علاوہ ازیں ویکسینیشن کے عمل کی حوصلہ افزائی کرنے کے لیے این سی او سی مختلف مراعات متعارف کرانے پر غور کررہی ہے۔