اسرائیلی فوج کی شمالی غزہ میں شدید بمباری،50 سے زائد فلسطینی شہید

شمالی غزہ کے علاقے شجاعیہ میں اسرائیلی فوج کی شدید بمباری میں 50 سے زائد فلسطینی شہید ہو گئے۔

غیر ملکی میڈیا کے مطابق شجاعیہ کے علاقے پر مسلسل فضائی اور زمینی حملے جاری ہیں۔ شجاعیہ میں اسرائیل کے حملہ آور ہونے کے بعد ہزاروں فلسطینی ایک بار پھر جبری نقل مکانی پر مجبور ہوگئے۔

دوسری جانب صیہونی میڈیا کا دعویٰ ہے کہ اسرائیل نے یہ حملہ شجاعیہ میں القسام بریگیڈ کے مجاہدین کی واپسی کی اطلاع ملنے کے بعد کیا۔

ادھر فلسطینی مزاحمتی گروپوں نے بھی اسرائیلی فوج پر راکٹوں اور بارودی سرنگوں سے حملے کردیے جس کے نتیجے میں کئی اسرائیلی ٹینک تباہ ہوگئے۔

یہ بمباری ایک ایسے وقت میں کی گئی ہے جب غزہ کی پٹی پر جنگ 265ویں دن میں داخل ہو چکی ہے، جب کہ اسرائیلی فورسز کی جانب سے پٹی کے متعدد علاقوں خاص طور پر جبالیہ اور نصیرات کیمپوں، خان یونس اور بیت لاہیہ پرشدید بمباری جاری ہے۔

گزشتہ روز غزہ میں وزارت صحت نے جنگ میں ہلاکتوں کی تعداد کے بارے میں تازہ ترین اپ ڈیٹ جاری کرتے ہوئےبتایا تھا کہ 7 اکتوبر سے اب تک 37,718 فلسطینی ہلاک اور 86,377 زخمی ہو چکے ہیں۔