سعودی عرب کا ویزٹ ویزا میں مفت توسیع کی سہولت دینے کا اعلان

تفصیلات کے مطابق سعودی خبر ایجنسی  کا کہنا ہے کہ ویزوں میں توسیع 31 جولائی تک کر دی جائے گی۔ اس سہولت کے تحت سعودی عرب سے باہر زائرین اپنے غیر استعمال شدہ ویزے کی توسیع کرا سکیں گے۔ پاکستان سمیت 20 ممالک کے جن شہریوں کے سعودی وزٹ ویزے ختم ہو رہے تھے وہ فیس کے بغیر ان میں توسیع کرا سکیں گے۔یہ توسیع خادم حرمین شریفین شاہ سلمان بن عبدالعزیز کی ہدایت پر کی گئی ہے۔

سعودی وزارتِ خارجہ نے اس ضمن میں وزارتِ داخلہ اور خزانہ کے تعاون سے الیکٹرونک خدمات کا آغاز کر دیا ہے۔ بیرونِ ملک زائرین بغیر کسی فیس کے الیکٹرونک خدمات سے فائدہ اٹھا سکیں گے۔سعودی  شاہی ہدایات  کے مطابق یہ اقدام مہلک کورونا وائرس سے نمٹنے کے لئے کی جانیوالی  احتیاطی تدابیر کے اثرات کو کم کرنے  کیلئے  کوششوں کا ایک حصہ ہے۔

اس سے قبل سعودی محکمہ پاسپورٹ نے بیرون مملکت مقیم غیر ملکیوں کے اقاموں، وزٹ ویزوں اور خروج و عودہ کے ویزوں میں ایک مرتبہ پھر خود کار توسیع شروع کردی ۔ محکمہ پاسپورٹ  نے کہا ہے کہ " بیرون مملکت موجود ان اقامہ ہولڈرز کے اقاموں، خروج و عودہ ویزوں اور وزٹ ویزے میں توسیع ہوگی جہاں سے آمد پر کورونا وائرس پھیلنے سے روکنے کیلئے پابندی لگی ہوئی ہے اور یہ توسیع 31 جولائی 2021 تک ہوگی۔

خیال رہے کہ  اس سے قبل پابندی والے ممالک میں مقیم  افراد کے اقاموں، وزٹ ویزوں اور خروج وعودہ میں دو جون 2021 تک توسیع کی گئی تھی۔