جوڈیشل کمپلیکس توڑ پھوڑ کیس: بانی پی ٹی آئی کے پروڈکشن سے متعلق رپورٹ طلب

جوڈیشل کمپلیکس توڑ پھوڑ کیس میں اسلام آباد کی انسداد دہشتگردی عدالت نے سپرنٹنڈنٹ اڈیالہ جیل سے بانی پی ٹی آئی عمران خان کے پروڈکشن سے متعلق رپورٹ طلب کر لی۔

بانی پی ٹی آئی عمران خان ، شاہ محمود قریشی ، عمر ایوب ، علی نواز اعوان و دیگر رہنماؤں کے خلاف تھانہ سی ٹی ڈی اور تھانہ گولڑہ میں درج دو مقدمات کی سماعت انسداد دہشتگردی عدالت کے جج طاہر عباس سپرا نے سماعت کی۔

جج نے ریمارکس دیے کہ عمران خان اور پرویز الٰہی سمیت 176 ملزمان کا چالان آگیا ہے، ایڈووکیٹ سردار مصروف نے بتایا کہ اسد عمر اس کیس سے ڈسچارج ہوچکے ہیں، جج نے کہا کہ جو ملزمان غیر حاضر ہیں ان کے ناقابل ضمانت وارنٹ جاری کر رہے ہیں، آخری موقع ہے اگر آئندہ سماعت پر حاضری یقینی نہ بنائی گئی تو ضمانتیں خارج کردی جائیں گی۔

بعد ازاں عدالت نے کیسز کی سماعت 29 جولائی تک ملتوی کردی۔

یاد رہے کہ عمران خان، شاہ محمود قریشی ، عمر ایوب ، علی نواز اعوان و دیگر رہنماؤں کے خلاف تھانہ سی ٹی ڈی اور تھانہ گولڑہ میں 2 مقدمات درج ہیں، توڑ پھوڑ کیسز میں بانی پی ٹی آئی سمیت دیگر قیادت پر ایما کا الزام ہے، ان کیسز میں علی نواز اعوان ، عمر ایوب اور علی امین گنڈا پور عبوری ضمانت پر ہیں۔